З 12 лістапада па 15 снежня ў зале дакументаў міжнародных арганізацый (пам. 207g) дэманструецца выстаўка “Глабальная сетка ААН у галіне развіцця”, прысвечаная 50-годдзю стварэння Праграмы развіцця Арганізацыі Аб'яднаных Нацый.
Праграма развіцця Арганізацыі Аб’яднаных Нацый (ПРААН) была створана ў лістападзе 1965 года ў выніку зліцця Спецыяльнага фонду ААН, заснаванага ў 1958 годзе, і пашыранай праграмы тэхнічнай дапамогі, заснаванай у 1949 годзе. Агульнае кіраўніцтва Праграмай ажыццяўляе Выканаўчы савет у складзе 36 членаў, якія прадстаўляюць як краіны, што развіваюцца, так і развітыя. Узначальвае ПРААН адміністратар, назначэнне якога зацвярджаецца Генеральнай Асамблеяй ААН. З красавіка 2009 года пост адміністратара займае спадарыня Хелен Кларк (Новая Зеландыя). Штаб-кватэра арганізацыі знаходзіцца ў Нью-Ёрку.
Праграма развіцця Арганізацыі Аб’яднаных Нацый (ПРААН) з’яўляецца глабальнай сеткай ААН у галіне развіцця. Яна выступае ў падтрымку пераўтварэнняў і дае дзяржавам – членам ААН доступ да крыніц ведаў, практычнага вопыту і рэсурсаў з мэтай садзейнічання паляпшэнню жыцця насельніцтва. У працэсе развіцця свайго патэнцыялу краіны выкарыстоўваюць вопыт і веды персаналу ПРААН і шырокага круга яе партнёраў. Арганізацыя ажыццяўляе дзейнасць у больш за 170 краінах і тэрыторыях, аказваючы ім садзейнічанне ў пошуку рашэнняў і абмене вопытам па праблемах дэмакратычнага дзяржаўнага кіравання, скарачэння беднасці, прадухілення крызісаў і ліквідацыі іх наступстваў, пытаннях энергетыкі і аховы навакольнага асяроддзя, інфармацыйных і камунікацыйных тэхналогій, барацьбы з ВІЧ/СНІДам.
Супрацоўніцтва Рэспублікі Беларусь і ПРААН пачалося ў 1992 годзе з адкрыцця ў Мінску пастаянна дзеючага Прадстаўніцтва ААН/ПРААН. Мандат ПРААН у Беларусі вызначаны Пагадненнем паміж Урадам Беларусі і ПРААН ад 24 верасня 1992 года. На дадзены час у сваёй дзейнасці ПРААН пацверджаны палажэннямі Дакумента краінавай праграмы на 2011–2015 гг. Праграма ажыццяўляецца па наступных тэматычных кірунках: эканамічнае развіццё і сацыяльная абарона; энергазахаванне і ахова навакольнага асяроддзя; прафілактыка распаўсюджвання ВІЧ/СНІД і барацьба з туберкулёзам; эфектыўнае і адказнае дзяржаўнае кіраванне і бяспека чалавека.
У сваёй рабоце ПРААН выкарыстоўвае рэсурсы беларускага грамадства, перш за ўсё патэнцыял урадавых устаноў на нацыянальным і дзяржаўным узроўнях, арганізацый грамадзянскага супольніцтва і прыватнага сектара. ПРААН таксама імкнецца выкарыстаць большы аб’ём замежнай дапамогі з мэтай садзейнічання Беларусі ў рашэнні названых праблем.
Асноўнай формай дзейнасці ПРААН па аказанні дапамогі Беларусі з’яўляецца праект, які ажыццяўляецца згодна з праектным дакументам (дагаворам) паміж ПРААН і іншымі партнёрамі і змяшчае план дасягнення мэт, а таксама спосаб ацэнкі іх ажыццяўлення.
Пастановай Савета Міністраў № 457 ад 1 чэрвеня 2015 г. урад Беларусі адобрыў рамачную праграму ААН па аказанні дапамогі Рэспубліцы Беларусь з мэтай развіцця (ЮНДАФ) на 2016–2020 гады. Новая рамачная праграма засяродзіць увагу на чатырох найбольш важных для краіны галінах: устойлівае эканамічнае развіццё; інклюзіўнае, адказнае і падсправаздачнае кіраванне; захаванне спрыяльнага навакольнага асяроддзя і ўстойлівае выкарыстанне прыроднага патэнцыялу, заснаванае на прынцыпах “зялёнай” эканомікі; устойлівае развіццё чалавечага капіталу з упорам на здароўе, адукацыю, сацыяльную ўключанасць і сацыяльную абарону.
На выстаўцы прадстаўлена звыш 60 дакументаў з фондаў НББ на рускай і англійскай мовах: кнігі, перыядычныя выданні, брашуры, буклеты.
Экспазіцыя складаецца з наступных раздзелаў:
- Асноўныя кірункі дзейнасці ПРААН:
- эканамічнае развіццё і сацыяльная абарона;
- энергазахаванне і ахова навакольнага асяроддзя;
- прадухіленне распаўсюджвання ВІЧ/СНІДа і прафілактыка туберкулёзу;
- падтрыманне дэмакратычнага кіравання, правасуддзе і правы чалавека.
- Дзейнасць ПРААН у Рэспубліцы Беларусь.
Выстаўка будзе цікавая спецыялістам у галіне міжнароднага права, сусветнай палітыкі, міжнародных адносін, сацыёлагам, работнікам сферы адукацыі і аховы здароўя, студэнтам і выкладчыкам, а таксама ўсім, хто цікавіцца дзейнасцю ПРААН і найважнейшымі кірункамі супрацоўніцтва нашай краіны з гэтай арганізацыяй.
Карысныя спасылкі
- Праграма развіцця Арганізацыі Аб’яднаных Нацый (ПРООН)
- Вэб-сайт ПРААН
- ПРААН у Беларусі
- Дзейнасць ААН па скарачэнні маштабаў галечы
- Дзейнасць ААН па садзейнічанні развіццю ў сусветным маштабе
- ААН працуе для людзей і планеты
- Выканаўчы савет
Дакументы
- Даклады
- Даклады аб развіцці чалавека
- Нацыянальная справаздача аб чалавечым развіцці ў Рэспубліцы Беларусь
- Рашэнні Выканаўчага савета
- Даклады Выканаўчага савета
- Сумесныя даклады адміністратара ПРААН і дырэктара-выканаўца ЮНФПА Эканамічнаму і сацыяльнаму савету
- Штогадовыя даклады адміністратара ПРААН Эканамічнаму і сацыяльнаму савету
- Фінансавыя даклады і правераныя фінансавыя ведамасці