З 12 кастрычніка па 10 лістапада ў бібліятэцы (3-ці паверх, кальцавы калідор) арганізавана кніжна-ілюстрацыйная выстаўка “Пяшчотная, мілая, добрая”, прымеркаваная да Дня маці (14 кастрычніка).
Лёс кожнага чалавека звязаны з імем маці – увасабленнем пяшчоты і цеплыні. Матчына любоў нараджае ў нас дабрыню і жаданне змяняць жыццё да лепшага.
У розных краінах Дзень маці адзначаюць у розны час.
У Беларусі ён супадае з вялікай праваслаўнай урачыстасцю – Пакровам Прасвятой Багародзiцы – і святкуецца 14 кастрычніка.
Дзень маці дапамагае нам яшчэ мацней адчуць веліч і святасць найважнейшага прызначэння жанчыны, звязанага з нараджэннем і выхаваннем дзяцей, усвядоміць яе велізарную ролю ў захаванні і ўмацаванні духоўных каштоўнасцей, маральных ідэалаў. Стваральная роля маці, пазітыўныя жыццёвыя арыенціры ў дзяцей – гэта тыя асновы, без якіх немагчыма ўмацаванне прэстыжу сям’і, духоўнае ўзнаўленне грамадства.
У экспазіцыі прадстаўлена каля 200 сучасных выданняў, якія асвятляюць самыя важныя для кожнай клапатлівай маці тэмы: выхаванне дзяцей, здаровы лад жыцця, правільнае харчаванне, захаванне сямейных традыцый і звычаяў, планіроўка, абсталяванне і камфортнае ўладкаванне жылля.
Асобны раздзел выстаўкі “Паспяховая жанчына-маці” прысвечаны жанчынам, якія змаглі рэалізаваць сябе і як маці, і як асоба, дабіцца поспеху і кар’ернага росту, выдатна сумяшчаць выхаванне дзяцей і працу.
Экспазіцыя дапоўнена багатым ілюстрацыйным матэрыялам і ўяўляе цікавасць для шырокага кола чытачоў, асабліва маладых мам, якія атрымаюць шмат карысных парад і рэкамендацый.
Тэлефон для даведак: (8 017) 293 29 80.
Да Дня маці Нацыянальнай бібліятэкай Беларусі падрыхтавана таксама віртуальная выстаўка "Першае слова ў кожным лёсе".
 |
 |
 |
 |
 |
 |
 |
 |
 |
