З 3 па 31 сакавіка 2008 года ў зале беларускай літаратуры (пам. 205) праходзіць выстаўка "Празаік, даследчык, перакладчык", прысвечаная 100-годдзю з дня нараджэння Янкі (Івана Захаравіча) Шарахоўскага, беларускага пісьменніка, літаратуразнаўца, крытыка.
Янка Шарахоўскі – пісьменнік яркай творчай індывідуальнасці, які ўвасабляў высокую эрудыраванасць, прынцыповасць, ідэйную перакананасць. Як крытык спрабаваў не проста пагаварыць пра вартасці і недахопы пэўных твораў, а разгледзець творчасць таго ці іншага пісьменніка ў цэлым, у сукупнасці з усім літаратурным працэсам.
Літаратурная спадчына Я. Шарахоўскага прадстаўлена зборнікамі апавяданняў "Срэбраная раніца" (1951), "Сплочаны доўг" (1978), кнігай для дзяцей "Сердалікавая бухта" (1955), а таксама публікацыямі асобных твораў аўтара, змешчаных у калектыўных зборніках і часопісах.
Аб глыбіні таленту Янкі Шарахоўскага, яго шматграннасці, зайздросным уменні спалучаць у адной асобе крытыка, даследчыка, публіцыста і эсэіста, бібліёграфа і літаратуразнаўцу сведчыць манаграфія "Пясняр народных дум", выдадзеная ў 2-х частках (1970, 1976). Гэта першая грунтоўная навуковая біяграфія Я. Купалы, якая адрозніваецца ад папярэдніх біяграфічных прац больш строгай навуковай дакументаванасцю, багаццем новых матэрыялаў пра жыццё і дзейнасць песняра. Акрамя гэтага, Шарахоўскі даследаваў жыццёвы і творчы шлях В. Дуніна-Марцінкевіча, Ф. Багушэвіча, В. Таўлая, П. Пестрака, В. Каваля.
Асобным раздзелам прадстаўлены пераклады на беларускую мову, зробленыя Я. Шарахоўскім з рускай і ўкраінскай моў: раманаў І. Тургенева "Рудзін" і "Напярэдадні", М. Бубянова "Белая бяроза", А. Первенцава "Чэсць змоладу", П. Фёдарава "Генерал Даватар", апавяданне М. Шолахава "Лёс чалавека", Салтыкова-Шчадрына "Казкі", Ф. Гладкова "Аповесць пра дзяцінства" і іншыя.
На выстаўцы можна пазнаёміцца з літаратурай пра жыццё і творчасць Я. Шарахоўскага. Сярод даследчыкаў – М. Мушынскі, А. Марціновіч, А. Есакоў, С. Карабан, В. Барысенка, Я. Усікаў, М. Дзяшкевіч, Я. Герцовіч, і іншыя.
Кантактны тэлефон: 293-27-16
 |
 |
 |
 |
 |
 |
