З 15 студзеня па 6 лютага 2009 года ў зале выяўленчых і відэадакументаў (пам. 307) Нацыянальнай бібліятэкі Беларусі праходзіць кніжна-ілюстрацыйная выстаўка “Прарок рускіх авангардыстаў”, прысвечаная 170-годдзю з дня нараджэння Поля Сезана (1839–1906) – вядучага прадстаўніка постімпрэсіянізму.
Жывапісная сістэма большасці твораў гэтага мастака заснавана на спалучэнні трох асноўных колераў (жоўтага, зялёнага, блакітнага) і пабудове геаметрычных формаў пры дапамозе асобных мазкоў.
Мастацтва Сезана па-рознаму вытлумачвалася, спарадзіла мноства паслядоўнікаў, і кожная з новых плыняў абвяшчала яго сваім роданачальнікам.
Асноўныя рысы стылю майстра знайшлі свой працяг у многіх прадстаўнікоў рускага авангарда – Р. Фалька, А. Купрына, А. Лянтулава і іншых.
На выстаўцы экспануюцца альбомы, кнігі, артыкулы, паштоўкі і рэпрадукцыі работ Поля Сезана і яго паслядоўнікаў.
Экспазіцыя разлічана на ўсе катэгорыі чытачоў, якія цікавяцца гісторыяй і развіццём еўрапейскага выяўленчага мастацтва пачатку ХХ стагоддзя.
Кантактны тэлефон: 293-27-53.
 |
 |
 |
 |
 |
 |
