22 студзеня а 17-й гадзіне пад час адкрыцця кніжна-ілюстрацыйнай выстаўкі ў бібліятэцы адбудзецца літаратурна-творчая вечарына “Вялікі талент, вялікая работа, вялікае сэрца”.
У праграме вечарыны – сустрэча з лаўрэатамі прэміі “За духоўнае адраджэнне” і спецыяльных прэмій Прэзідэнта Рэспублікі Беларусь дзеячам культуры і мастацтва 2008 года.
Прэмія Прэзідэнта Рэспублікі Беларусь А.Р. Лукашэнкі "За духоўнае адраджэнне" была заснавана больш за дзесяць гадоў таму і з’яўляецца сведчаннем дзяржаўнага прызнання заслуг навуковай і творчай інтэлігенцыі, тых, хто асабліва вылучыўся ў гуманітарнай і дабрачыннай дзейнасці. Прэмія прысуджаецца штогод за выдатныя творы літаратуры і мастацтва, актыўную падзвіжніцкую дзейнасць у гуманітарнай вобласці, накіраваную на развіццё прагрэсіўных мастацка-маральных традыцый, якія спрыяюць умацаванню духоўных каштоўнасцей.
Нацыянальная бібліятэка Беларусі арганізуе кніжна-ілюстрацыйную выстаўку, на якой будуць прадстаўлены шматлікія матэрыялы з розных калекцый бібліятэкі пра ўсіх лаўрэатаў, якія сваім мастацтвам і плённай працай славяць родную Беларусь. Гэта кнігі, выяўленчыя матэрыялы (плакаты, фота, паштоўкі), ноты, перыядычныя і электронныя выданні.
Ва ўрачыстым мерапрыемстве прыме ўдзел аўтарскі калектыў дзесяцітомнага выдання «Беларусы» Інстытута мастацтвазнаўства, этнаграфіі і фальклору імя К. Крапівы НАН Беларусі на чале з дырэктарам А.І. Лакоткам, протаіерэй, настаяцель рэлігійнай абшчыны «Прыход храма прападобнага Серафіма Сароўскага ў г. Мінску Мінскай епархіі Беларускай праваслаўнай царквы» айцец Аляксандр (Шырытон), дырэктар Рэспубліканскага навукова-практычнага цэнтра дзіцячай анкалогіі і гематалогіі В.В. Алейнікава, галоўны рэдактар выдавецтва «Мастацкая літаратура» В.А. Шніп, рэдактар аддзела выяўленчага мастацтва рэдакцыйна-выдавецкай установы «Культура і мастацтва» Н.В. Шаранговіч, дырэктар Дзяржынскай дзіцячай школы мастацтваў А.У. Гірэль.
Лаўрэаты спецыяльных прэмій: заслужаны аматарскі калектыў студыі сучаснага бальнага танца «Мара» Мінскага трактарнага завода, народны фальклорны калектыў «Гасцінец» Ракаўскага цэнтра культуры і вольнага часу, вакальны ансамбль выкладчыкаў «Элегія» Дзяржынскай дзіцячай школы мастацтваў і ансамбль старадаўняй музыкі — парадуюць сваімі творчымі выступленнямі ўсіх прысутных. Госці вечарыны змогуць пазнаёміцца з работамі юных талентаў Беларусі — навучэнцаў Дзяржынскай дзіцячай школы мастацтваў.
Падчас сустрэчы ад Нацыянальнай бібліятэкі Беларусі Рэспубліканскаму навукова-практычнаму цэнтру дзіцячай анкалогіі і гематалогіі будзе падораны камплект кніг.
Уваход цэнтральны.
Тэлефон для даведак: 293-29-80, 293-27-67.
Е-mail: pr@nlb.by
