З 14 кастрычніка па 29 лістапада ў зале выяўленчых і відэадакументаў (пам. 307) праходзіць выстаўка "Мецэнацтва ў Расіі", прысвечаная 170-годдзю з дня нараджэння рускага прадпрымальніка, мецэната і тэатральнага дзеяча Савы Іванавіча Мамантава (1841–1918).
За ўсю гісторыю чалавецтва толькі нямногіх людзей прырода ўзнагародзіла велізарнай колькасцю самых розных талентаў. Яшчэ менш было тых, хто здолеў годна скарыстаць у жыцці такі шчодры дарунак лёсу. І ў ліку гэтых нешматлікіх – Сава Іванавіч Мамантаў – прамысловец, будаўнік чыгунак, музыкант, пісьменнік, скульптар, рэжысёр, чалавек, які казаў, што яго самы галоўны талент – гэта "знаходзіць таленты".
Мецэнацтва ў Расіі ў канцы XIX – пачатку XX ст. было важнай часткай духоўнага жыцця грамадства. На Русі дабрачыннасць як грамадская сістэма дапамогі ("призрения") стала складацца з прыняццем хрысціянства, з’яўленнем манастыроў. Ахвяруючы на храм, багадзельню і прытулак, вернікі ратавалі свае душы. Мір у душы патрэбен любому чалавеку, бо без гэтага жыццё не ў радасць. Вось чаму рускія людзі будавалі лякарні і тэатры, збіралі бясцэнныя мастацкія калекцыі і дарылі іх бязвыплатна.
Для XIX–XX стст. характэрна дабрачыннасць прадстаўнікоў асвечанага дваранства. Вынікі іх дзейнасці засталіся ў назвах створанага: Галіцынская бальніца, Шарамецеўскі дом для багамольцаў ("странноприимный дом"), Марыінская бальніца і інш. Канец XIX – пачатак XX ст. – залатога веку рускага мецэнацтва – прадстаўлены ў гісторыі Расіі Траццякоўскай галерэяй, Бахрушынскім тэатральным музеем, Шчукінскімі і Марозаўскімі зборамі сучаснага французскага жывапісу, Музеем вытанчаных мастацтваў, Саладоўнікаўскай і Аляксееўскай бальніцамі, шматлікімі прытулкамі і дамамі бясплатных кватэр Рукавішнікавых, Бахрушыных і інш.
На выстаўцы экспануюцца альбом-каталог са збору графаў Шарамецевых, альбом-каталог Румянцаўскага музея, фатаграфіі з калекцыі Дзяржаўнага Эрмітажа, зборнік "Юсуповский дворец", унікальнае выданне запісных кніжак А.П. Бахрушына (1916) і іншыя цікавыя дакументы.
Усяго ў экспазіцыі – звыш 160 дакументаў. Гэта не толькі мастацкія альбомы, але і кнігі, артыкулы, календары, рэпрадукцыі, паштоўкі.
Кантактны тэлефон: 293-27-58.
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
