Летапіс жыцця народа

З 20 чэрвеня па 26 жніўня ў зале выяўленчых і відэадакументаў (пам. 307) праходзіць выстаўка “Летапіс жыцця народа”, прысвечаная 85-годдзю Нацыянальнай кінастудыі “Беларусьфільм”.

Беларускі кінематограф нарадзіўся ў снежні 1928 г. як “Белдзяржкіно”. Першыя карціны заснавальнікі нацыянальнага кіно Ю. Тарыч і У. Корш-Саблін стваралі ў Ленінградзе, бо свая вытворчая база ў той час адсутнічала.

З 1926 па 1940 г. у беларускі кінематограф прыйшлі рэжысёры, чые работы заклалі яго аснову і спрыялі адлюстраванню эпохі ў героіка-эпічнай форме. У сталіцу кінастудыя пераехала ў 1939 г., а з 1946-га атрымала назву “Беларусьфільм”.

Нацыянальны кінематограф дасягнуў росквіту ў 1950–1960-я гг. У той перыяд быў створаны залаты фонд беларускага кіно: “Чырвонае лісце”, “Гадзіннік спыніўся апоўначы”, “Альпійская балада”, “Я родам з дзяцінства” і інш. Гэта была эпоха разнастайнасці тэм, жанраў, стылявых рашэнняў, нетрадыцыйнага прачытання класікі. Менавіта тады ў кожны дом прыйшоў тэлевізійны шматсерыйны фільм. Шырокае прызнанне сярод гледачоў атрымалі тэлефільмы “Руіны страляюць”, “Дзяржаўная граніца”, “Пра Чырвоную Шапачку”, “Бацькі і дзеці”.

Перыяд творчага ўздыму нацыянальнага кіно прыйшоўся на 1970-я гг. і непарыўна звязаны з імёнамі, якія сталі класікай беларускага кінематографа: В. Турава, І. Дабралюбава, В. Рыбарава, Л. Нячаева, М. Пташука, В. Рубінчыка, В. Нікіфарава. У тыя гады кінастудыя выпускала звыш 100 фільмаў у год – ігравых, дакументальных, мультыплікацыйных. Гэта перыяд экранізацыі бясцэнных шэдэўраў беларускіх пісьменнікаў І. Мележа, А. Макаёнка, В. Быкава, У. Караткевіча, І. Шамякіна, А. Адамовіча, І. Чыгрынава. Дастаткова назваць “Людзі на балоце”, “Подых навальніцы”, “Знак бяды”, “Ідзі і глядзі”, “Дзікае паляванне караля Стаха”.

На выстаўцы шырока прадстаўлены даведачныя выданні, кнігі, артыкулы, прысвечаныя беларускаму кінамастацтву. Сярод экспануемых дакументаў можна ўбачыць рэжысёрскія сцэнарыі вядомых карцін “Магіла льва” (рэжысёр. В. Рубінчык), “Наш браняпоезд” (рэжысёр М. Пташук), “Запіскі паляўнічага” і “Завеі, снежань” (рэжысёр В. Тураў) і інш. Выставачныя стэнды таксама пазнаёмяць наведвальнікаў з фестывальнымі афішамі 1980-х гг. Дапаўняюць экспазіцыю мультымедыйныя выданні, прагляд якіх магчымы на абсталяванні, устаноўленым у зале.

Усяго ж у экспазіцыі прадстаўлена звыш 80 дакументаў.

Кантактны тэлефон: (8 017) 293 27 58.