З 12 па 29 студзеня ў зале выяўленчых і відэадакументаў (пам. 307) праходзіць выстаўка “Казкі на мальберце”, прысвечаная 80-годдзю беларускай мастачкі ў галіне станковага жывапісу і кніжнай графікі Алены Лось.
Творчы шлях лаўрэат рэспубліканскіх і ўсесаюзных конкурсаў “Мастацтва кнігі” Алена Георгіеўна Лось пачынала менавіта як ілюстратар. Наведвальнікі выстаўкі маюць магчымасць убачыць шэраг любімых кніг беларускіх народных казак, загадак, прымавак, прыпевак, якія афармляла таленавітая мастачка. Яе працы – “Залатая яблынька”, “Разумная дачка”, “Прыляцелі гусі а з беленькай Русі”, “За ельнічкам, за бярэзнічкам”, “Калыханка” – кранаюць цеплынёй і дарослых і маленькіх, іх яскравасць і колеравая насычанасць прывабліваюць і адразу запамінаюцца.
Паралельна з аздабленнем дзіцячых кніг і часопісаў мастачка актыўна працуе ў галіне станковай графікі. У 60–70-я гг. ХХ ст. адбыўся сапраўдны росквіт беларускага лінарыта, у тым ліку каляровага. Алена Лось выдатна адчула магчымасці гэтай тэхнікі, адаптавала яе да сваіх творчых задум. Некаторыя з вядомых серый лінарытаў прадстаўлены на выстаўцы – “Дзеці Белавежы”, “Палескі матыў”, “Ружанскія паданні”.
Не абмінула мастачку і захапленне літаграфіяй. Яна стварыла некалькі значных цыклаў каляровых літаграфій па матывах беларускага фальклору і паэзіі Янкі Купалы, а таксама паводле сваіх палескіх вандровак.
На працягу ўсяго творчага шляху Алена Георгіеўна захоплена працуе над нацюрмортамі. У яе творчым набытку пераважалі “тэмперныя букеты”, прывезеныя з падарожжаў.
За дзесяцігоддзі творчага служэння беларускай кнізе мастачка аздобіла цэлую бібліятэчку самых розных выданняў, адзначаных ганаровымі дыпломамі рэспубліканскіх і міжнародных конкурсаў. Большая частка іх экспануецца на выстаўцы. Гэта зборнікі беларускіх народных казак “З рога ўсяго многа”, “Ох і залатая табакерка”, “Ладачкі-ладкі”, кнігі Алеся Якiмовіча “Вераб’ёвы госці”, Васіля Віткі “Дударык”, Змітрака Бядулі “Скарб”, Авяр’яна Дзеружынскага “Кую-кую ножку”, Ніла Гілевіча “Загадкі”, Уладзіміра Ягоўдзіка “Бабуліна варта” і інш.
Дапаўняюць экспазіцыю альбомы, кнігі, часопісы, рэпрадукцыі, эстампы, паштоўкі, якія адлюстроўваюць найбольш яскравыя моманты творчасці мастачкі. На выстаўцы прадстаўлена больш за 100 дакументаў.
Кантактны тэлефон: (8 017) 293 27 58.