З 6 жніўня па 6 верасня ў зале дакументаў міжнародных арганізацый (2-гі паверх, пам. 207g) адкрыта кніжная выстаўка “Карэнныя народы: зберагчы культуру – захаваць народ”, прысвечаная Міжнароднаму дню карэнных народаў свету.
Гэты дзень вызначаны рашэннем Генеральнай Асамблеі ААН (рэзалюцыя 49/214 ад 23 снежня 1994 г.) і штогод адзначаецца 9 жніўня, пачынаючы з 1995 года.
Міжнародны дзень карэнных народаў свету закліканы ўмацаваць міжнароднае супрацоўніцтва ў рашэнні праблем, з якімі сутыкаюцца карэнныя народы ў такіх сферах, як культура, адукацыя, ахова здароўя, правы чалавека, навакольнае асяроддзе, сацыяльнае і эканамічнае развіццё. Правядзенне гэтага дня садзейнічае павышэнню ўзроўню інфармаванасці аб культурных традыцыях і разнастайнасці карэнных народаў. Гэта свята прадастаўляе шырокай сусветнай грамадскасці магчымасць падвоіць намаганні ў барацьбе з ізаляцыяй, дыскрымінацыяй і жабрацтвам, праяўленні якіх па-ранейшаму сустракаюцца ў жыцці большасці гэтых людзей.
Колькасць карэнных народаў ацэньваецца ў 300–500 мільёнаў чалавек. Яны жывуць у больш чым 70 краінах і прадстаўляюць больш чым 5000 моў і культур на ўсіх кантынентах. Аб’яднаныя шматгадовай гісторыяй барацьбы за выжыванне, яны, тым не менш, захоўваюць сваю самабытнасць і унікальнасць.
Дзесяцігоддзямі карэнныя народы пры актыўным удзеле Арганізацыі Аб’яднаных Нацый вядуць непрымірымую барацьбу за валоданне зямельнымі рэсурсамі і адстойваюць свае культурныя правы як на мясцовым, так і на глабальным узроўнях. Гістарычным крокам у вырашэнні іх праблем стала прыняцце Генеральнай Асамблеі ААН у верасні 2007 года Дэкларацыі Арганізацыі Аб’яднаных Нацый аб правах карэнных народаў. У Дэкларацыі прызнаецца тое значнае месца, што займаюць ў свеце культуры карэнных народаў, і іх жыццёва важны ўклад у нашу багатую культурную разнастайнасць, якое, гаворачы словамі яе прэамбулы, складае “агульную спадчыну чалавецтва”.
Культура кожнага карэннага народа унікальная. Нягледзячы на тое, што многія з іх маюць падобны светапогляд і агульныя асаблівасці, уласцівыя ўсім карэнным народам, але ў аснове іх культур ляжыць розная гісторыя і месца жыхарства.
Выстаўка, якая прапануецца чытачам, налічвае каля 60 дакументаў, большую частку якіх складаюць дакументы міжнародных арганізацый (ААН, ЮНЕСКА, Сусветнага банка, Савета Еўропы і інш.) на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.
Экспазіцыя ўключае наступныя тэматычныя раздзелы:
- міжнародныя стандарты і нацыянальныя заканадаўствы ў галіне абароны і падтрымкі правоў чалавека ў карэнных народаў;
- карэнныя народы – захавальнікі культурнай разнастайнасці, біяразнастайнасці і нематэрыяльнай культурнай спадчыны;
- навакольнае асяроддзе, сацыяльнае і эканамічнае развіццё карэнных народаў;
- асноўныя адукацыйныя праграмы і шляхі вырашэння праблем, якія стаяць перад карэннымі народамі ў галіне аховы здароўя.
Выстаўка прызначана для шырокага кола чытачоў, якія цікавяцца пытаннямі этнаграфіі, культуры, дэмаграфіі.
Карысныя спасылкі
- Дэкларацыя ААН аб правах карэнных народаў
- Дзейнасць Вярхоўнага камісара ААН па правах чалавека
- Дапаможнік для ўдзельнікаў Пастаяннага форуму ААН па пытаннях карэнных народаў
- Першае міжнароднае дзесяцігоддзе карэнных народаў свету(1995–2004 гады)
- Спецыяльныя дакладчыкі
- Рабочая група па карэнных народах*
- Дапаможнік ААН для карэнных народаў
- Прызнанне і ўмацаванне ролі карэнных народаў і мясцовых супольнасцей
- Дзеці – прадстаўнікі карэнных народаў у Аўстраліі
- Школьны кібераўтобус*
- Пытанні, якія часта задаюць: Дэкларацыя аб правах карэнных народаў
- Змены клімату і карэнныя народы
- Мовы карэнных народаў
- Карэнныя народы ў гарадах і міграцыя
- Карэнныя народы: землі, тэрыторыі і прыродныя рэсурсы
- Асноўныя звесткі пра карэнныя народы*
- УВКПЧ і карэнныя народы*
- Карэнныя народы, жабрацтва і мэты развіцця тысячагоддзя*
- Карэнныя народы і рэгіён Ціхага акіяна*