З 3 па 18 жніўня 2009 года ў зале беларускай літаратуры (пам. 205) праходзіць юбілейная кніжная выстаўка "Шчырая споведзь", прысвечаная 80-годдзю з дня нараджэння беларускага паэта Алеся (Аляксандра Сяргеевіча) Ставера (1929–1995).
Асноўныя тэмы творчасці А. Ставера – любоў да роднай зямлі, працоўныя будні і святы вяскоўцаў, гераічнае мінулае беларускага народа, маладосць і каханне. Яго паэзіі ўласцівы блізкая да фальклору вобразнасць, гутарковая інтанацыя, напеўнасць. Многія творы А. Ставера перакладзены на польскую, украінскую, татарскую, армянскую і іншыя мовы.
На выстаўцы прадстаўлена больш за 80 выданняў, якія сістэматызаваны ў пяць раздзелаў. Першы раздзел "Промні душы чалавечай" уключае паэтычныя зборнікі і кнігі прозы пісьменніка, у ліку якіх "Золак над Бярозай" (1959), "Ластаўкі перад дажджом" (1967), "Жураўлі ляцяць..." (1972), "Лірнік" (1975), "Жнівеньскі вырай" (1979), "Мой край беларускі" (1983), "Зоры зямныя" (1989), "Усмешкі – промні душы чалавечай" (1996), раман "Пад канвоем" (1969), кнігі аповесцей і апавяданняў "Да сваіх" (1974), "Лясныя аповесці" (1986). Тут жа экспануюцца творы для дзяцей, якія ўвайшлі ў зборнікі "Касцёр не гасне" (1961), "Пад вясёлкавай дугой" (1984).
Працягвае экспазіцыю раздзел "Лірыка нязгасных пачуццяў", у якім прадстаўлены публікацыі твораў А. Ставера ў часопісах і калектыўных зборніках.
Многія лірычныя творы паэта пакладзены на музыку і сталі папулярнымі песнямі: "Жураўлі на Палессе ляцяць" (муз. І. Лучанка), "Беларусачка" (муз. Ю. Семянякі і А. Хлімановіча), "Колас, ты мой колас" (муз. М. Чуркіна) і шэраг іншых. Усе яны прадстаўлены ў раздзеле "Пявучыя струны душы".
Чацвёрты раздзел выстаўкі "Сардэчнасць і натуральнасць" прысвечаны перакладам твораў Алеся Ставера.
Пра жыццё і творчасць паэта раскажуць публікацыі ў энцыклапедычных выданнях, часопісах і зборніках, прадстаўленыя ў апошнім раздзеле "Творчы пашпарт пісьменніка".
Кантактны тэлефон: 293-27-16.