З 10 жніўня па 13 верасня ў аддзеле абслугоўвання афіцыйнымі дакументамі (2-гі паверх, пам. 207) адкрыта тэматычная выстаўка “Рабства ў XXI стагоддзі: прычыны феномена і механізмы супрацьдзеяння”.

Выстаўка прысвечана Міжнароднаму дню памяці ахвяр гандлю рабамі і яго ліквідацыі.

Гэты дзень штогод адзначаецца 23 жніўня па рэкамендацыі 150-й сесіі выканаўчага савета ЮНЕСКА ў памяць аб паўстанні рабоў на Гаіці ў 1791 годзе, якое паклала пачатак працэсу ліквідацыі сістэмы рабства.

Рабства з’яўляецца велізарнай трагедыяй і адной з самых змрочных старонак чалавечай гісторыі. На сённяшні дзень рабаўладальніцтва афіцыйна забаронена ва ўсіх дзяржавах свету. Апошняя па часе забарона на валоданне рабамі і выкарыстанне рабскай працы была ўведзена ў Маўрытаніі ў 1981 годзе. Тым не менш, у сучасных умовах рабаўладальніцтва не проста існуе, але і квітнее, у тым ліку ў свабодных і дэмакратычных дзяржавах. Лічыцца, што чалавек з’яўляецца рабом, калі ў дачыненні да яго выконваюцца тры ўмовы:

яго дзейнасць кантралюецца іншымі асобамі з дапамогай гвалту або парозы яго прымянення;
ён знаходзіцца ў дадзеным месцы і займаецца дадзеным відам дзейнасці не па сваёй волі і пазбаўлены фізічнай магчымасці змяніць сітуацыю па ўласным жаданні;
за сваю працу ён або не атрымлівае платы наогул, або атрымлівае мінімальную аплату.

“Новы гандаль рабамі” стаў адной з самых вострых і шырокамаштабных праблем сучаснасці. Сёння рабства існуе ў новых формах і закранае мільёны чалавек ва ўсім свеце. Сучасныя формы рабства – гэта, перш за ўсё, працоўнае рабства, калі чалавек выкарыстоўваецца на плантацыях або ў цяжкіх умовах прамысловай працы, дамашняе рабства, пазыковае рабства, выкарыстанне людзей у якасці донараў для трансплантацыі органаў і тканак, прымусовае замужжа, прымусовая цяжарнасць і выношванне дзяцей, фіктыўнае ўсынаўленне, гандаль людзьмі і сексуальнае рабства. Ахвярамі падману і гвалту, як правіла, з’яўляюцца выхадцы з найменш абароненых сацыяльных груп, бежанцы, мігранты. Па даных ААН, штогод мільёны людзей, у асноўным жанчыны і дзеці, становяцца “жывым таварам” і эксплуатуюцца. Таму адкрыццё выстаўкі, якая закранае адну з найбольш небяспечных праблем сучаснага свету, вельмі актуальна.

Выстаўка пазнаёміць чытачоў з даследаваннямі феномена рабства і гандлю людзьмі, а таксама з міжнародна-прававымі аспектамі рэгулявання і супрацьдзеяння дадзенай праблеме ў рамках ААН, Еўрапейскага саюза, АБСЕ і Савета Еўропы.

Матэрыялы выстаўкі раскрываюць розныя аспекты праблемы новага гандлю людзьмі ў нашай краіне. Рэспубліка Беларусь увайшла ў лік краін-лідэраў барацьбы з гандлем людзьмі. Прапанова нашай краіны аб фарміраванні пад эгідай ААН глабальнага руху “Партнёрства супраць рабства і гандлю людзьмі ў ХХІ стагоддзі” выклікала цікавасць з боку ўсіх краін-членаў ААН і шэрага іншых міжнародных арганізацый.

Выстаўка ўключае наступныя тэматычныя раздзелы:

вытокі, формы праяўлення і сутнасць рабства і гандлю рабамі ў свеце;
сучасныя формы рабства;
міжнародна-прававыя аспекты рэгулявання барацьбы з рабствам і гандлем рабамі;
міжнароднае супрацоўніцтва ў сферы барацьбы з рабствам і гандлем людзьмі;
Рэспубліка Беларусь супраць трафікінгу.

У экспазіцыі прадстаўлена каля 100 дакументаў на рускай, англійскай, французскай і нямецкай мовах. Большую частку экспазіцыі складаюць дакументы міжнародных арганізацый: кнігі, брашуры, мімеаграфаваныя дакументы ААН, перыядычныя выданні.

Выстаўка прызначана для шырокага кола чытачоў, прадстаўнікоў праваахоўных органаў, а таксама для суддзяў, адвакатаў, выкладчыкаў і студэнтаў вышэйшых навучальных устаноў, усіх зацікаўленых станам праблем кіравання працэсамі барацьбы з міжнародным рабствам і гандлем рабамі.

Карысныя спасылкі