З 6 па 30 ліпеня ў зале беларускай літаратуры (пам. 205) адкрыта юбілейная кніжная выстаўка "Гонар беларускай навукі", прысвечаная 100-годдзю з дня нараджэння Гілера Маркавіча Ліўшыца (1909–1983), беларускага вучонага, заслужанага дзеяча навукі БССР.
На працягу навуковай дзейнасці ў галіне гісторыі і філасофіі Г.М. Ліўшыц вывучаў сацыяльна-эканамічнае, палітычнае становішча і ідэалогію старажытнага свету (пераважна Іудзеі і Рыма) і сярэдневяковай Еўропы, пытанні навуковага атэізму і гісторыі філасофіі. Гілер Маркавіч – адзін з найбуйнейшых даследчыкаў Кумранскіх рукапісаў.
На кніжнай выстаўцы прадстаўлена больш за 120 дакументаў, сістэматызаваных ў тры раздзелы.
Першы раздзел "Доктар гістарычных і філасофскіх навук" уключае асобныя выданні шматлікіх навуковых прац вучонага: "Классовая борьба в Иудее и восстания против Рима" (1957), "Кумранские рукописи и их историческое значение" (1959), "Социально-политическая борьба в Риме 60-х гг. І в. до нашей эры и заговор Катилины" (1960), "Происхождение христианства в свете рукописей Мертвого моря" (1967), "Очерки историографии Библии и раннего христианства" (1970), "Свободомыслие и материалистическая философия в Западной Европе (вторая половина ХVII в.)" (1975), "Французские просветители ХVIII века о религии и церкви" (1976), "Реформационное движение в Чехии и Германии" (1978), "Атеизм русских революционных демократов" (1979), "Религия и церковь в истории общества" (1980), "Критика идеализма и религии в трудах Г.В. Плеханова" (1981) і шэраг іншых.
У другім раздзеле "Даследчык антычнай гісторыі" экспануюцца публікацыі гістарычных і філасофскіх прац вучонага за розныя гады, надрукаваныя ў часопісах, выданнях з працягам і калектыўных навуковых зборніках, а таксама яго працы як рэдактара і рэцэнзента.
Трэці раздзел "Асоба, даследчык, педагог" прадстаўляе публікацыі калег і сяброў вучонага пра яго жыццё, навуковую і выкладчыцкую дзейнасць, змешчаныя ў энцыклапедычных выданнях, зборніках і часопісах. Асобай увагі заслугоўвае прысвечаная вучонаму кніга "Г.М. Лившиц: историографический очерк" (1994), напісаная гісторыкам М.Б. Батвіннікам, у якой падрабязна расказваецца пра жыццё і творчую лабараторыю вучонага.
Выстаўка ілюстравана фотаздымкамі Г.М. Ліўшыца.
Кантактны тэлефон: 293-27-16.
