З 5 красавіка па 12 мая ў зале выяўленчых і відэадакументаў (пам. 307) ладзіцца выстаўка “Геній чыстай прыгажосці”, прысвечаная 530-годдзю з дня нараджэння італьянскага жывапісца і архітэктара эпохі Адраджэння Рафаэля Санці (1483–1520).
Апагей італьянскага мастацтва атаясамліваецца перш за ўсё з імем чароўнага Рафаэля. На працягу пяці стагоддзяў яго творы застаюцца ўзорам эстэтычнай дасканаласці.
Увасобіўшы самыя ўзнёслыя ўяўленні рэнесанснага гуманізму пра свабоду чалавека, яго духоўную і фізічную дасканаласць, майстар стварыў універсальны вобраз выдатнага чалавека Высокага Адраджэння, які ўвабраў найглыбейшыя ідэі пра сутнасць і гармонію быцця.
Толькі ў фрызе і франтонах Парфенона і ў Ватыканскіх фрэсках Рафаэля смяротныя людзі ўзвышаліся да гарманічнай і дасканалай прыгажосці напаўбагоў, і форма, адлюстроўваючы ў прасветленых вобразах прыметы рэальнага свету, стала дасканалым выражэннем найвышэйшых ідэалаў эпохі і ўсяго чалавецтва.
Мадонны Рафаэля – гэта блаславёнае святло, якое сыходзіць з нябёсаў, дыялог жывапісца з часам пасродкам Боскага мацярынскага пачатку. На выстаўцы можна ўбачыць “Мадонну Конестабіле”, “Мадонну з Немаўлём і святымі”, “Даму з аднарогам” і іншыя творы, дзе Рафаэль, урбінец, па-майстэрску спалучае чысціню і пяшчоту летуценняў паэта з рэлігійнай сузіральнасцю і пакорлівай набожнасцю каталіка.
У партрэтах майстра ўвасоблены вобразы сучаснікаў, поўныя спакою і велічнай годнасці, адзначаныя пячаткай праніклівай адухоўленасці. Такія партрэты папы Юлія II, Аньёла Доні, Бальдасарэ Касцільёне і іншыя, рэпрадукцыі якіх прадстаўлены ў экспазіцыі.
Безумоўны трыумф творчасці генія – размалёўка папскіх пакояў Ватыканскага палаца, так званыя Станцы. У трох сумежных залах мастак адлюстроўвае не пасіўны сход святых і вернікаў, як падобную тэму трактаваў бы жывапіс трэчэнта, а па-майстэрску далучае гледачоў, робячы іх актыўнымі ўдзельнікамі дыспуту ў “Афінскай школе” або “Выгнання Геліядора з храма”, слухачамі спеву багоў “Парнаса” або выгнаннікамі “Пажару ў Борга”.
Вазары далучае Рафаэля да смяротных багоў. Сапраўды, мастацтва, дасягнуўшы пад час свайго развіцця вяршынь, тут як бы на імгненне спынілася, каб даць атрымаць асалоду ідэальнай раўнавагай свету і чалавека.
Ён пісаў: “Рафаэль усіх перамагаў сваёй прыветлівасцю і мастацтвам, але больш за ўсё сваім геніем добрай натуры, поўнай высакароднасці і міласэрнасці…”.
Усяго ж на выстаўцы прадстаўлена звыш 80 дакументаў: рэпрадукцыі палотнаў, кнігі, публікацыі і даведачная літаратура пра мастака.
Экспазіцыя разлічана на ўсе катэгорыі чытачоў.
Кантактны тэлефон: (8 017) 293 27 58.