З 1 верасня па 31 кастрычніка ў зале перыядычных выданняў (пам. 106) праходзіць выстаўка “Дзівосныя дарогі ў краіну ведаў”, прымеркаваная да Дня ведаў (1 верасня).
Гэта выдатнае восеньскае свята прыходзіць літаральна ў кожны дом. Яго з нецярпеннем чакаюць першакласнікі, для якіх школьны званок празвініць упершыню і пачнецца новае жыццё, поўнае адкрыццяў і займальных падзей. Тыя, хто ідзе на заняткі не ў першы раз, адчуваюць хваляванне перад пачаткам новага вучнёўскага або студэнцкага жыцця ў чаканні сустрэчы з аднакласнікамі і любімымі выкладчыкамі. Для педагогаў Дзень ведаў не проста свята – гэта новы этап у карпатлівай, сур’ёзнай працы, ад якой залежыць наша будучыня.
Поспех і шчасце дзіцяці шмат у чым вызначаецца яго здольнасцю вучыцца. Менавіта ў малодшым школьным узросце актыўна ўдасканальваюцца працэсы і якасці, неабходныя для разумовай і творчай дзейнасці. Ці існуюць прыёмы, якія дапамагаюць дзецям вучыцца? Адказы на гэта пытанне апублікаваны на старонках часопісаў “Пачатковая школа”, “Пралеска”, “Пачатковае навучанне: сям’я, дзіцячы сад, школа”.
Калі ў пачатку шляху дзяцей накіроўваюць бацькі і педагогі, то ўжо ў сярэдняй школе ўсё большае значэнне набываюць навыкі самаадукацыі. Парады па эфектыўным засваенні вучэбнага матэрыялу, нетрывіяльным і паспяховым рашэнні задач, якія ўстаюць перад старшакласнікамі, наведвальнікі выстаўкі могуць знайсці ў публікацыях часопісаў “Біялогія і хімія”, “Матэматыка”, “Фізіка”, “Геаграфія”, “Информатика в школе”, “Иностранные языки в школе” і інш.
Цікавымі для бацькоў, чые дзеці ідуць у школу, стануць практычныя парады з газет “Аргументы и факты”, “Комсомольская правда в Белоруссии” і інш.
Усяго экспазіцыя змяшчае каля 40 перыядычных выданняў.
Кантактны тэлефон: (8 017) 293 25 87.
 |
 |
 |
 |
 |
 |
