З 13 сакавіка па 28 красавіка 2009 года ў Нацыянальнай бібліятэцы (2-гі паверх, кальцавы калідор) праходзіць выстаўка “Беларуская канстытуцыйная традыцыя”, прысвечаная 15-годдзю Асноўнага Закону Рэспублікі Беларусь.
Канстытуцыі розных краін свету, прынятыя ў канкрэтных гістарычных умовах, з’яўляюцца выражэннем юрыдычна ўладкаванага грамадзянскага свету, грамадскай згоды, балансу ўзаемаадносін улады і асобы.
Канстытуцыя – асноўны выток нацыянальнага права, яна вяршэнствуе ў адносінах да ўсіх іншых прававых актаў, якія прымаюцца на нацыянальным узроўні. У любым грамадстве канстытуцыя выконвае складаныя функцыі: усталёўвае раўнавагу палітычных сіл, дэкларуе стратэгію развіцця дзяржавы, яе мэты і ідэалы, замацоўвае ідэалагічны выбар грамадства.
15 сакавіка 1994 года была прынята пятая, а па сутнасці першая Канстытуцыя новай, суверэннай дзяржавы – Рэспублікі Беларусь. Напярэдадні дзяржаўнага свята – Дня Канстытуцыі – Нацыянальная бібліятэка Беларусі прапануе тэматычную кніжную выстаўку, мэта якой – прадставіць асноўныя вехі канстытуцыйнага развіцця Беларусі праз рэтраспектыўны аналіз, паказаць гістарычную пераемнасць Статута Вялікага княства Літоўскага і сучаснага Асноўнага Закону рэспублікі, адлюстраваць бясспрэчны ўплыў прававога помніка, якім ганарыцца Беларусь, на развіццё нацыянальнага права. Сутнасці Канстытуцыі і яе значэнню ў сучасных умовах для ўмацавання правапарадку ў краіне прысвечаны цэлы раздзел экспазіцыі.
Кантактны тэлефон: 293-28-86.