13 сакавіка 2009 года ў Нацыянальнай бібліятэцы Беларусі адбылася ўрачыстая цырымонія ўручэння пашпартоў грамадзян Рэспублікі Беларусь прадстаўнікам адоранай моладзі ў галіне спорту, культуры, навукі.
Цырымонія прайшла ў рамках штогадовай Усебеларускай акцыі “Мы – грамадзяне Беларусі!”, прымеркаванай да Дня Канстытуцыі Рэспублікі Беларусь. Мэта акцыі – павышэнне значнасці паняцця “грамадзянін Рэспублікі Беларусь” у свядомасці 16-гадовых маладых людзей, якія атрымліваюць пашпарт Рэспублікі Беларусь, прыцягненне ўвагі дзяржаўных органаў і грамадскіх арганізацый да пытанняў грамадзянска-патрыятычнага выхавання моладзі. Нацыянальная бібліятэка Беларусі, як адзін з арганізатараў мерапрыемства, падтрымала правядзенне акцыі.
Уступным словам юных грамадзян віталі міністр адукацыі Рэспублікі Беларусь Аляксандр Міхайлавіч Радзькоў, першы сакратар Цэнтральнага камітэта БРСМ Юрый Уладзіміравіч Крывадубскі, намеснік дырэктара Нацыянальнай бібліятэкі Беларусі па навуковай рабоце і сувязях з грамадскасцю Людміла Генадзьеўна Кірухіна.
Пасля ўрачыстага ўручэння пашпартоў для маладых людзей была арганізавана азнаямляльная экскурсія па будынку Нацыянальнай бібліятэкі Беларусі.
У рамках мерапрыемства ў атрыуме 2-га паверха супрацоўнікамі аддзела галерэйна-выставачнай дзейнасці была аформлена тэматычная кніжная выстаўка “Беларуская канстытуцыйная традыцыя”, прымеркаваная да Дня Канстытуцыі Рэспублікі Беларусь. Выстаўка будзе дапоўнена і працягне сваё экспанаванне ў кальцавым калідоры 2-га паверха.