З 13 лістапада па 11 снежня ў зале нотных і аўдыядакументаў (пам. 305) праходзіць выстаўка “Англійскія традыцыі і сучаснасць”, прысвечаная 100-годдзю з дня нараджэння англійскага кампазітара, піяніста і дырыжора Бенджаміна Брытэна.
Бенджамін Эдвард Брытэн (1913–1976) з’яўляецца адным з найбольш значных кампазітараў XX ст. Яго роля ў англійскай культуры каласальная: ён адрадзіў айчынную музыку, у якой не было буйных з’яў на працягу амаль двухсот гадоў, пасля смерці Г. Гендэля. Музыка Б. Брытэна вылучаецца высокім майстэрствам, глыбінёй і своеасаблівасцю задум.
Асноўнае месца ў творчасці кампазітара займаюць музычна-тэатральныя творы, оперы, аперэты, прытчы, а таксама сачыненні, звязаныя ў той або іншай ступені з духоўнай тэматыкай.
Бенджамін Эдвард сур’ёзна вывучае народную музыку, апрацоўвае англійскія, шатландскія і французскія песні. Адно з лепшых сачыненняў першага перыяду творчасці кампазітара – “Сем санетаў Мікеланджэла” для тэнара і фартэпіяна (1940), музыка душэўнага замяшання, смутку і горычы. Гэты вопыт паслужыў падрыхтоўчым этапам да работы над першымі опернымі творамі. А паглыбленае вывучэнне творчай спадчыны Г. Персела і іншых англійскіх кампазітараў XVI–XVII стст. спрыяла станаўленню індывідуальнага стылю Б. Брытэна, звязанага з нацыянальнай англійскай традыцыяй. На многія гады опера стала для кампазітара асноўнай сферай прымянення яго велізарнага таленту. Шырокае прызнанне атрымалі оперы "Пітэр Граймс" (1945), “Альберт Херынг” (1947), “Сон у летнюю ноч” (1960) і інш.
У 1961 г. Брытэн пачаў работу над "Ваенным рэквіемам" – унікальным помнікам ахвярам вайны, самым значным сваім творам. Трагічнае і мужнае сачыненне, прысвечанае вострым сучасным праблемам, якое асуджае мілітарызм і заклікае да міру, стала вяршыняй другога творчага перыяду.
Асноўную частку экспазіцыі складаюць нотныя выданні, грампласцінкі, кампакт-дыскі з запісамі твораў аўтара: оперы “Паварот вінта” (1954), “Сон у летнюю ноч” (1960), "Простая сімфонія" (1934), “Вясновая сімфонія” (1949), “Варыяцыі на тэму Фрэнка Брыджа” (1940) і інш. Сярод прадстаўленых дакументаў – канцэрты, сюіты, п’есы для фартэпіяна, апрацоўкі народных песень і іншыя шматлікія сачыненні.
Дапаўняюць выстаўку артыкулы з перыядычных выданняў і кніг пра жыццё і творчасць кампазітара.
Кантактны тэлефон: (8 017) 293 27 52.
 |
 |
 |
 |
 |
 |
 |
 |
 |
 |
 |
 |
