З 13 лістапада да 9 снежня ў Нацыянальнай бібліятэцы Беларусі (2-гі паверх, кальцавы калідор) праходзіць выстаўка “Жизнь замечательных людей”.
“Жизнь замечательных людей” – серыя біяграфічных і мастацка-біяграфічных кніг, якія выпускаліся з 1890 г. выдавецтвам Ф.Ф. Паўленкава.
Арыгінальная серыя выдавалася ў Санкт-Пецярбургу ў 1890–1907 гг. Перавыданні выходзілі да 1924 г. Усяго ў гэтай серыі выйшла 198 біяграфій у 193 кнігах агульным тыражом звыш 1,5 мільёна экзэмпляраў. У 1933 г. па ініцыятыве Максіма Горкага серыя была адноўлена “Журнально-газетным объединением”.
Пачынаючы з 1938 г. і па сённяшні дзень серыя выдаецца “Молодой гвардией”. У гады Вялікай Айчыннай вайны кнігі выходзілі пад назвай “Великие люди русского народа”.
Цяпер выдавецтва “Молодая гвардия” працуе над серыямі “Жизнь замечательных людей: Серия биографий”, “Жизнь замечательных людей. Малая серия: Серия биографий” і “Жизнь замечательных людей. Биография продолжается…”.
Усяго ў асноўнай серыі выйшла звыш 1 400 кніг агульным тыражом больш за 100 мільёнаў экзэмпляраў.
Выстаўка “Жизнь замечательных людей”, падрыхтаваная Нацыянальнай бібліятэкай Беларусі, уключае ўсе асноўныя перыяды гэтага выдання, пачынаючы з часоў “паўленкаўскай” серыі. Звыш 300 кніг размяшчаюцца ў храналагічным парадку. Завяршае экспазіцыю, прысвечаную знакамітай біяграфічнай серыі, беларускі аналаг – серыя “Жыццё знакамітых людзей Беларусі”, якая была заснавана ў 2004 г. выдавецтвам “Мастацкая літаратура”. У ёй былі апублікаваны манаграфіі пра самых вядомых дзеячаў літаратуры, культуры і спорту Беларусі: Я. Коласа, Я. Купалу, М. Танка, М. Багдановіча, У. Караткевіча, І. Шамякіна, У. Мулявіна, М. Яроменку, М. Пташука, М. Фінберга, Р. Янкоўскага, А. Мядзведзя і інш.
Кантактны тэлефон: (8 017) 293 29 80.