З 21 верасня па 10 кастрычніка ў зале беларускай літаратуры (пам. 205) праходзіць кніжная выстаўка “Адданы тапаніміцы роднай Беларусі”, прысвечаная 80-годдзю з дня нараджэння Яўгена Нічыпаравіча Рапановіча (1929–1987), беларускага мовазнаўца, фалькларыста.
У цэнтры экспазіцыі грунтоўная лексікаграфічная праца аўтара – шматтомны слоўнік назваў населеных пунктаў Беларусі па абласцях: “Слоўнік назваў населеных пунктаў Віцебскай вобласці” (1977), “Слоўнік назваў населеных пунктаў Брэсцкай вобласці” (1980), “Слоўнік назваў населеных пунктаў Мінскай вобласці” (1981), “Слоўнік назваў населеных пунктаў Гродзенскай вобласці” (1982), “Слоўнік назваў населеных пунктаў Магілёўскай вобласці” (1983), “Слоўнік назваў населеных пунктаў Гомельскай вобласці” (1986).
Сярод работ аўтара, прадстаўленых на выстаўцы, зборнік “Беларускія прыказкі, прымаўкі і загадкі” (1958; 2-е выд. 1974), “Слоўнік фізічных і астранамічных тэрмінаў: для сярэдняй школы” (1979, у сааўт. з А. Болсунам), а таксама яго пераклад на рускую мову, які выйшаў у 1986 г.
Яўген Нічыпаравіч вядомы як аўтар перакладаў на беларускую мову твораў замежных аўтараў. Да ўвагі наведвальнікаў выстаўкі аповесць Алекса Ла Гума “Каменная краіна” (1975) у перакладзе Я.Н. Рапановіча.
Шэраг матэрыялаў экспазіцыі пазнаёміць з жыццёвым і творчым лёсам даследчыка.
Кантактны тэлефон: 293-27-16.