З 15 кастрычніка па 7 лістапада ў аддзеле абслугоўвання афіцыйнымі дакументамі (пам. 207) адкрыта выстаўка “ААН для міру і дабрабыту народаў”, прысвечаная Дню Арганізацыі Аб'яднаных Нацый.

Дзень ААН – гэта дзень нараджэння Арганізацыі Аб’яднаных Нацый: 24 кастрычніка 1945 года ўступіў у сілу асноўны дакумент Арганізацыі – яе Статут.

Гэты Дзень быў абвешчаны 31 кастрычніка 1947 года на 2-й сесіі Генеральнай Асамблеі ААН (рэзалюцыя № 168). Ён штогод адзначаецца 24 кастрычніка пачынаючы з 1948 года.

Святкаванне Дня Арганізацыі Аб’яднаных Нацый служыць напамінам пра тое, што наша планета – гэта наш агульны дом і з дапамогай усеагульнага дыялогу і супрацоўніцтва можна вырашыць любыя наяўныя праблемы. Традыцыйна ў гэты дзень ва ўсім свеце праводзяцца сустрэчы, дыскусіі і выстаўкі, прысвечаныя мэтам ААН і яе дасягненням.

Арганізацыя Аб’яднаных Нацый з’яўляецца ўнікальнай міжнароднай арганізацыяй, заснаванай для падтрымання міру і бяспекі ва ўсім свеце, развіцця сяброўскіх адносін паміж краінамі і аказання садзейнічання сацыяльнаму прагрэсу. На дадзены момант членамі Арганізацыі Аб’яднаных Нацый з’яўляецца 192 дзяржавы. Прыём у члены Арганізацыі адкрыты для ўсіх міралюбівых краін і ажыццяўляецца рашэннем Генеральнай Асамблеі па рэкамендацыі Савета Бяспекі.

Аб Арганізацыі Аб’яднаных Нацый ведаюць у самых аддаленых кутках планеты. Дзейнасць Арганізацыі шматгранная і ахоплівае шырокі круг важных праблем ад устойлівага развіцця, барацьбы супраць тэрарызму, падтрымання дэмакратыі, развіцця сістэмы кіравання, аховы навакольнага асяроддзя да рашэння глабальных медыцынскіх праблем, размініравання, развіцця вытворчасці прадуктаў харчавання. Гэта Арганізацыя здольная пакласці канец насіллю і ўкараніць памяркоўнасць; садзейнічаць развіццю і забяспечыць роўнасць; абараніць правы чалавека і паменшыць маштабы галечы. Агульнавядомыя поспехі Арганізацыі Аб’яднаных Нацый у такіх галінах дзейнасці, як падтрыманне міру і гуманітарная дапамога. ААН працуе на дабрабыт планеты, усіх працоўных і ўсіх народаў і спрыяе рашэнню многіх найскладанейшых праблем чалавецтва.

Шматгранная дзейнасць ААН па пазбаўленні будучых пакаленняў ад бедстваў вайны, падтрыманні міру і міжнароднай бяспекі, развіцці дружалюбных адносін паміж нацыямі на аснове прынцыпу раўнапраўя і самавызначэння народаў, ажыццяўленні міжнароднага супрацоўніцтва ў вырашэнні міжнародных праблем эканамічнага, сацыяльнага, культурнага і гуманітарнага характару раскрываецца ў дакументах, экспануемых на выстаўцы. У асобным раздзеле прадстаўлена літаратура, якая асвятляе розныя аспекты супрацоўніцтва Рэспублікі Беларусь і Арганізацыі Аб’яднаных Нацый.

Рэспубліка Беларусь стаяла ля вытокаў стварэння ААН. Наша краіна была ў ліку 51 дзяржавы – заснавальніцы Арганізацыі Аб’яднаных Нацый. Супрацоўніцтва паміж Рэспублікай Беларусь і Арганізацыяй Аб’яднаных Нацый з’яўляецца адным з прыярытэтных напрамкаў знешнепалітычнай дзейнасці нашай краіны. Беларуская дэлегацыя пастаянна ўдзельнічае ў рэгулярных і спецыяльных сесіях Генеральнай Асамблеі, Эканамічнага і сацыяльнага савета і іншых кіруючых органаў ААН. Рэспубліка Беларусь заўсёды імкнулася займаць у рамках ААН актыўную пазіцыю па крытычна важных пытаннях і праблемах міжнароднага парадку дня і ўносіць рэальны ўклад у рашэнне гэтых праблем. Прадстаўніцтва ААН у Беларусі пачало функцыянаваць у 1992 годзе. Супольнасць ААН у Рэспубліцы Беларусь уключае 11 агенцтваў, фондаў і праграм сістэмы ААН.

На выстаўцы прадстаўлена звыш 100 дакументаў з фондаў Нацыянальнай бібліятэкі Беларусі на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.

Экспазіцыя складаецца з наступных тэматычных раздзелаў:

ААН: гісторыя і сучаснасць.
Правы чалавека.
Міжнароднае права.
Гуманітарныя пытанні.
Падтрыманне міру і міжнароднай бяспекі.
Эканамічнае і сацыяльнае развіццё.
ААН і Рэспубліка Беларусь.

Выстаўка будзе цікавай спецыялістам у галіне міжнароднага права і міжнародных адносін, палітолагам, студэнтам і выкладчыкам, а таксама ўсім, хто цікавіцца дзейнасцю ААН.

Кантактны тэлефон: (8 017) 293 27 34.

Спіс літаратуры

Карысныя спасылкі

Асноўныя звесткі