12 сакавіка ў бібліятэцы прайшоў семінар “Электронна-бібліятэчная сістэма «Айбукс.ру» (ibooks.ru) для інфармацыйнага забеспячэння навукі і адукацыі”.
Увазе слухачоў быў прапанаваны агляд электронна-бібліятэчнай сістэмы “Айбукс.ру” (ibooks.ru) – рэсурсу, які змяшчае поўныя тэксты сучаснай вучэбнай, навуковай і дзелавой літаратуры па розных напрамках ад вядучых сусветных і расійскіх выдавецтваў (O’Reilly Media, Manning Publication, Peachpit Press, Packt Publishing, Pearson Education Inc, “ВШЭ”, “Златоуст”, “Владос”, “Флинта” і інш.). Унікальны складнік ЭБС – падборка навучальных і прафесійных выданняў па IT-тэматыцы – кантэнт ад вядучых выдавецтваў Расіі, якія спецыялізуюцца ў IT: “БХФ-Петербург”, “Питер”, “ДМК-Пресс”, “Горячая линия-Телеком”, “Издательство МГТУ им. Н.Э. Баумана” і інш.
З прывітальным словам выступіў Віктар Пшыбытка – намеснік генеральнага дырэктара Нацыянальнай бібліятэкі Беларусі.
Асаблівую ўвагу на семінары надалі пытанням навігацыі і пошуку на платформе, асаблівасцям працы з асабістым кабінетам і адміністратарскім модулем. Удзельнікі абмеркавалі магчымасці камплектавання ў ЭБС, фарміравання калекцый у адпаведнасці з патрэбамі арганізацыі, а таксама стварэнне падборак актуальнай літаратуры спецыялістамі кампаніі “Айбукс”.
Спікерамі семінара выступілі прадстаўнікі кампаніі “Айбукс” – генеральны дырэктар Алена Корабава і кіраўнік па працы з кліентамі Лола Цвяткова.
Сустрэча прайшла ў змешаным фармаце: больш за 40 спецыялістаў бібліятэк з усіх рэгіёнаў Беларусі змаглі далучыцца як анлайн, так і вочна.
Віртуальная чытальная зала працягвае знаёмства з вядучымі электроннымі інфармацыйнымі рэсурсамі і заўсёды адкрыта для супрацоўніцтва!
Матэрыял пададзены аддзелам карпаратыўнага ўзаемадзеяння.
