З 28 лютага па 1 сакавіка ў Нацыянальнай бібліятэцы Беларусі праходзіў практычны семінар “Электронная медыцынская бібліятэка Рэспубліканскай навуковай медыцынскай бібліятэкі для адукацыі, навукі, практыкі”.
Электронная медыцынская бібліятэка – гэта база даных па медыцыне, ахове здароўя і сумежных галінах ведаў. У электронным каталогу сабрана больш за 950 тысяч навуковых выданняў, а менавіта: кнігі, аўтарэфераты дысертацый, дысертацыі, перыядычныя выданні, артыкулы з часопісаў і зборнікаў з фондаў Рэспубліканскай навуковай медыцынскай бібліятэкі (РНМБ).
28 лютага на адкрыцці семінара ў Нацыянальнай бібліятэцы Беларусі (НББ) з прывітальным словам да ўдзельнікаў і гасцей звярнулася намеснік дырэктара па навукова-метадычнай рабоце РНМБ Марына Пшыбытка.
З дакладам “Электронныя інфармацыйныя рэсурсы Рэспубліканскай навуковай медыцынскай бібліятэкі” выступіў Дзмітрый Сівураў, загадчык аддзела бібліятэчна-інфармацыйных тэхналогій РНМБ. У сваім выступленні ён пазнаёміў удзельнікаў з рэсурсам, распавёў пра яго асаблівасці і значэнне ў сферы адукацыі і навукі. Святлана Федчык, загадчыца аддзела бібліятэчнага абслугоўвання РНМБ, у сваім дакладзе “Электронная медыцынская бібліятэка РНМБ: асаблівасці выкарыстання” распавяла пра гісторыю стварэння, спецыфіку і магчымасці карыстання бібліятэкай.
Пасля тэарэтычнай часткі мерапрыемства перайшлі да знаёмства з рэсурсам на практыцы. Загадчыца інфармацыйна-аналітычнага аддзела РНМБ Вольга Аліноўская і Святлана Федчык правялі трэнінг па працы з электроннай медыцынскай бібліятэкай для супрацоўнікаў Нацыянальнай бібліятэкі. Кожны з удзельнікаў семінара меў магчымасць самастойна пазнаёміцца з рэсурсам на практыцы і задаць пытанні дакладчыкам.
У працяг семінара для супрацоўнікаў Нацыянальнай бібліятэкі 1 сакавіка была арганізавана экскурсія ў РНМБ, падчас якой адбылося знаёмства з асноўнымі напрамкамі яе дзейнасці. Супрацоўнікі НББ наведалі аддзел фарміравання рэсурсаў, інфармацыйна-аналітычны аддзел, аддзел інфармацыйна-бібліятэчнага абслугоўвання і аддзел фондасховішча.
Асаблівае ўражанне зрабіла наведванне Музея гісторыі медыцыны Беларусі. Прадстаўленыя ў музеі экспанаты даюць поўнае ўяўленне аб асноўных этапах станаўлення і развіцця медыцыны нашай краіны.
У канцы сустрэчы дырэктар РНМБ Вераніка Шутава ўручыла кожнаму ўдзельніку семінара сертыфікат аб праходжанні навучання працы з “Электроннай медыцынскай бібліятэкай РНМБ”.
Нагадваем, што доступ да электроннай медыцынскай бібліятэкі РНМБ адкрыты для ўсіх зарэгістраваных карыстальнікаў у чытальных залах Нацыянальнай бібліятэкі. Карыстальнікам даецца доступ да поўных тэкстаў дакументаў з фондаў РНМБ пасля афармлення замовы патрэбнага дакумента з дапамогай электроннага каталога. Рэгістрацыя на сайце электроннай бібліятэкі абавязковая.
Матэрыял пададзены аддзелам карпаратыўнага ўзаемадзеяння і навукова-даследчым аддзелам бібліятэказнаўства.
