17 мая ў Нацыянальнай бібліятэцы Беларусі ў рамках мерапрыемстваў віртуальнай чытальнай залы прайшоў семінар па вывучэнні магчымасцей працы з перыядычнымі выданнямі на электроннай платформе “ИВИС”.
Платформа “ИВИС” змяшчае поўныя тэксты рускамоўных навуковых часопісаў па ўсіх галінах ведаў, цэнтральную і рэгіянальную перыёдыку краін СНД, выданні Расійскай акадэміі навук, а таксама глыбокія архівы перыядычных выданняў СССР. Лічбавыя версіі цалкам адпавядаюць друкаваным аналагам.
У якасці запрошанага эксперта выступіў прадстаўнік ТАА “ИВИС” Дзмітрый Ушанаў. Ён прадставіў агляд функцыянальных магчымасцей працы з новым інтэрфейсам платформы, планы па пашырэнні асартыменту выданняў і развіцці сэрвісаў для працы з імі.
Мерапрыемства прайшло ў змешаным фармаце. У ім узялі ўдзел спецыялісты Нацыянальнай бібліятэкі Беларусі, Прэзідэнцкай бібліятэкі Рэспублікі Беларусь, іншых бібліятэк і інфармацыйных цэнтраў.
Нагадваем, што доступ да перыядычных выданняў на платформе “ИВИС” адкрыты для ўсіх зарэгістраваных карыстальнікаў бібліятэкі.
Віртуальная чытальная зала запрашае да супрацоўніцтва ўсе зацікаўленыя арганізацыі нашай краіны па пытаннях падпіскі на ліцэнзійныя базы даных і навучання працы з імі.
Матэрыял пададзены аддзелам карпаратыўнага ўзаемадзеяння.
