Прэзентацыя мемуараў народнага пісьменніка Беларусі Мікалая Чаргінца

31 студзеня а 16-й гадзіне ў галерэі “Лабірынт” адбудзецца прэзентацыя мемуараў народнага пісьменніка Беларусі Мікалая Чаргінца.

Мікалай Чаргінец – беларускі палітык, народны пісьменнік Беларусі, заслужаны дзеяч культуры Рэспублікі Беларусь, ганаровы грамадзянін г. Мінска, уладальнік міжнародных прэмій, дзяржаўных узнагарод СССР, Рэспублікі Беларусь і іншых краін.
Мікалай Іванавіч – аўтар больш за 50 твораў мастацкай літаратуры, некалькіх сцэнарыяў і п’ес. Яго кнігі перакладзены на многія мовы свету: азербайджанскую, англійскую, французскую, турэцкую, персідскую, іспанскую, таджыкскую і іншыя. Агульны тыраж кніг складае больш за 7 мільёнаў асобнікаў.

Пісьменнік прэзентуе 4 кнігі з цыкла аўтабіяграфічных раманаў “Трудные дороги жизни”, а таксама падзеліцца фактамі сваёй багатай біяграфіі, якія ўвойдуць у наступныя выданні.

Кнігі ўяўляюць вялікую цікавасць для сучаснага чытача. У іх народны пісьменнік М. Чаргінец распавядае пра свой лёс, пра тое, з чаго пачыналася яго самастойнае жыццё. Старонкі мемуараў напоўнены ўспамінамі пра сям’ю і пра тыя выпрабаванні, якія вытрымалі яго родныя і блізкія ў перыяд фашысцкай акупацыі г. Мінска.

Да мерапрыемства падрыхтавана выстава-прагляд пра жыццёвы і творчы шлях пісьменніка па матэрыялах Нацыянальнай бібліятэкі Беларусі. Акрамя таго, аўтар прадставіць рэдкія асобнікі сваіх кніг з асабістага архіва.

У прэзентацыі возьмуць удзел пісьменнікі, моладзь, а таксама героі кніг, з якімі Мікалай Чаргінец крочыў па жыцці разам.

Тэлефон для даведак: (8 017) 368 37 37.