Дата правядзення
Час правядзення
Месца правядзення
З 12 студзеня па 13 лютага ў зале дакументаў міжнародных арганізацый (пам. 207g) адкрыта тэматычная кніжная выстава “Халакост: без права на забыццё”, прысвечаная Міжнароднаму дню памяці ахвяр Халакосту.
Гэты Дзень быў заснаваны 1 лістапада 2005 года на 60 сесіі Генеральнай асамблеі ААН (рэзалюцыя 60/7 “Памяць пра Халакост”) і штогод адзначаецца 27 студзеня – у дзень вызвалення савецкімі войскамі найбуйнейшага нацысцкага канцэнтрацыйнага лагера Асвенцым-Біркенау ў 1945 годзе.
Халакост – гэта наўмысны і сістэматычны прыгнёт і вынішчэнне ў гады Другой сусветнай вайны нямецкімі нацыстамі і калабарацыяністамі з іншых краін прадстаўнікоў яўрэйскага народа, славян, цыган, людзей з разумовымі і фізічнымі адхіленнямі. З гэтай мэтай у Трэцім рэйху была распрацавана спецыяльная сістэма, часткай якой сталі створаныя ў Германіі і на акупіраваных ёю тэрыторыях лагеры смерці. Ахвярамі Халакосту сталі каля 6 млн яўрэяў. У лагерах смерці загінулі мільёны савецкіх ваеннапалонных і мірных грамадзян, прадстаўнікоў еўрапейскіх народаў.
Рэспубліка Беларусь была адной з краін-сааўтараў рэзалюцыі “Памяць пра Халакост”. За час вайны на тэрыторыі Беларусі былі знішчаны звыш 800 тыс. яўрэяў. Мерапрыемствы, прысвечаныя гэтаму дню памяці, штогод праводзяцца і ў нас у краіне.
У гады вайны Беларусь страціла кожнага трэцяга жыхара і прайшла праз усе жахі Халакосту. На акупіраванай нацыстамі тэрыторыі краіны было створана больш за дзве з паловай сотні лагераў смерці і месцаў масавага знішчэння людзей. Сярод іх – Мінскае гета, а таксама найбуйнейшы на тэрыторыі Беларусі нацысцкі лагер смерці “Трасцінец”, у якім знішчаліся мірныя жыхары, ваеннапалонныя і яўрэйскае насельніцтва, дэпартаванае з Аўстрыі, Германіі, Польшчы і іншых краін.
Прапанаваная чытачам выстава налічвае больш за 70 дакументаў на рускай, нямецкай і англійскай мовах: кнігі, перыядычныя выданні, брашуры, буклеты. Сярод іх – гістарычныя, дакументальныя, мемуарныя дакументы, якія распавядаюць аб Халакосце як адным з самых жахлівых злачынстваў нацыстаў. Усе гэтыя матэрыялы – сведчанні павагі да тых, хто выжыў, і даніна памяці загінулым ахвярам. Яны адлюстроўваюць надзею на тое, што вывучэнне гэтай трагедыі заахвоціць чалавецтва рашуча адкінуць усе формы расізму, насілля і антысемітызму.
Экспазіцыя складаецца з наступных тэматычных раздзелаў:
- Гісторыя Халакосту
- Гэта немагчыма забыць (успаміны пра Халакост)
- Урокі Халакосту
- Халакост на тэрыторыі Беларусі
Выстава будзе цікавая гісторыкам, спецыялістам у галіне міжнароднага права, сусветнай палітыкі, міжнародных адносін і праў чалавека, а таксама студэнтам, магістрантам, выкладчыкам.
Міжнародны дзень памяці ахвяр Халакосту закліканы нагадаць аб нязменнай прыхільнасці барацьбе з антысемітызмам, расізмам і іншымі формамі нецярпімасці, якія могуць прывесці да мэтанакіраваных актаў гвалту адносна цэлых груп людзей.
Карысныя спасылкі
- Міжнародны дзень памяці ахвяр Халакосту
- Брашура “Холокост и Организация Объединенных Наций: программа просветительской деятельности”
- 28-я спецыяльная сесія Генеральнай асамблеі “Святкаванне шасцідзясятай гадавіны вызвалення нацысцкіх канцэнтрацыйных лагераў” (24 студзеня 2005 г.)
Дакументы
- Рэзалюцыя Генеральнай асамблеі “Адмаўленне Халакосту” (26 студзеня 2007 г.)
- Рэзалюцыя ЮНЕСКА “Памяць пра Халакост” (2007)
- Рэзалюцыя Генеральнай асамблеі “Памяць пра Халакост” (1 лістапада 2005 г.)
- Даклад Сусветнай канферэнцыі па барацьбе супраць расізму, расавай дыскрымінацыі, ксенафобіі і звязанай з імі нецярпімасці (Дурбан, 31 жніўня – 8 верасня 2001 г.)
- Міжнародная канвенцыя аб ліквідацыі ўсіх форм расавай дыскрымінацыі (21 снежня 1965 г.)
- Прынцыпы міжнароднага супрацоўніцтва датычна выяўлення, арышту, выдачы і пакарання асоб, вінаватых у ваенных злачынствах і злачынствах супраць чалавецтва (3 снежня 1973 г.)
- Канвенцыя аб неўжывальнасці тэрміну даўнасці да ваенных злачынстваў і злачынстваў супраць чалавецтва (26 лістапада 1968 г.)
- Канвенцыя па папярэджанні і пакаранні злачынства генацыду (9 снежня 1948 г.)
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 34.
Матэрыял пададзены аддзелам абслугоўвання афіцыйнымі дакументамі.