Запрашаем адчуць смак беларускай кухні

18 кастрычніка ў бібліятэцы адбылося мерапрыемства “Смак беларускай кухні ў кнігах і паштоўках: новыя праекты Алены Мікульчык”.

Ужо больш за 20 год Алена Мікульчык – гісторык кулінарыі, тэле- і радыёвядучая – займаецца вывучэннем беларускай кухні, праводзіць лекцыі і майстар-класы. Алена ведае, што беларуская кухня мае багатую гісторыю і шматвяковыя традыцыі. Пацверджаннем таму – яе выдавецкія праекты, якіх ужо каля дзесяці.

Крыніцы натхнення кулінара – кнігі і вопыт прафесійных кухараў і нашых прабабуль. У яе бібліятэцы маюцца копіі выданняў ХІХ і пачатку ХХ ст. А пачыналася ўсё так: бібліятэкі, архівы, сустрэчы з гісторыкамі, знаўцамі, экспертамі ды і простымі людзьмі, якія памятаюць былыя часы, далі штуршок да глыбокага вывучэння гісторыі беларускай кухні. Больш за 10 гадоў Алена правяла ў кулінарных экспедыцыях па Беларусі і бліжнім замежжы, дзе пражываюць этнічныя беларусы. Кожнае новае выданне акумулюе назапашаны вопыт, які спалучае тэорыю і практыку, канцэптуальна адрозніваецца ад папярэдняга.

Яе кнігі карыстаюцца нязменнай папулярнасцю сярод чытачоў і адзначаны прэміямі на высокім дзяржаўным узроўні. Апошняя на дадзены момант – “Смак беларускай гісторыі” (выдавецтва “Беларусь”, 2022) – атрымала дыплом ІІ ступені Нацыянальнага конкурсу “Мастацтва кнігі – 2023” у намінацыі “Залатыя скрыжалі”.

Са старонак кулінарных кніг аўтаркі можна даведацца пра гісторыю і культуру харчавання беларусаў, адчуць смак кухні любога кірунку – сялянскай, гарадской, карчомнай, шляхецкай і каралеўскай. Галоўнае, што кожная страва адаптавана да ўмоў і разнастайнасці прадуктаў сучасных гаспадынь.

Мерапрыемства ладзіцца а 17-й гадзіне ў галерэі “Лабірынт” (3-ці паверх).

У праграме вас чакае:

• знаёмства з выданнямі Алены Мікульчык,
• інтэрактыўная гульня з прызамі на веданне беларускай кухні,
• дэгустацыя-абрад з жытнёвымі ламанцамі-праснакамі.

Уваход на мерапрыемства вольны.

Тэлефон для даведак: (8 017) 293 28 81.