Шлях мужнасці і славы

Да Дня Перамогі ў кальцавой галерэі 2-га паверха працуе выстаўка “Шлях мужнасці і славы”.

Дзень Перамогі – гэта вялікае свята, якое дазваляе захаваць светлую памяць аб Вялікай Перамозе і перадаць яе наступным пакаленням. Менавіта беларусы першымі прынялі на сябе вераломны ўдар нацысцкіх захопнікаў 22 чэрвеня 1941 года. Тысячы нашых суайчыннікаў змагаліся ў гэтай вайне. У бязлітаснай барацьбе з ворагам яны паказвалі прыклады мужнасці, стойкасці і гераізму, выконвалі адказныя задачы па абароне Айчыны.

На выстаўцы прадстаўлена каля 100 кніг, выдадзеных за апошняе дзесяцігоддзе. У іх распавядаецца пра гераізм, мужнасць і стойкасць беларускага і іншых народаў Савецкага Саюза ў гады Вялікай Айчыннай вайны. Экспазіцыя складаецца з наступных раздзелаў: “Гады ваеннага ліхалецця”, “Хроніка Вялікай Перамогі”, “Вялікая Перамога”, “Палкаводцы Вялікай Перамогі”, “Напісана вайной”, “Паклонімся вялікім тым гадам”.

Сярод адметнасцей экспазіцыі – выдадзеная Нацыянальным архівам Рэспублікі Беларусь серыя кніг “Без срока давности”, якая раскрывае тысячы дакументальных пацвярджэнняў злачынстваў нацыстаў і іх хаўруснікаў супраць мірнага насельніцтва на акупаванай тэрыторыі. Такія выданні дазваляюць сучаснікам адчуць сэрцам маштаб перанесеных бедстваў.

Кніга “Ніколі не забудзем”, што выйшла ў выдавецтве “Мастацкая літаратура”, нікога не пакіне абыякавым. Гэта сучаснае перавыданне зборніка, які ўпершыню ўбачыў свет у 1948 годзе і потым перавыдаваўся 12 разоў. У ім – апавяданні малых відавочцаў страшэнных злачынстваў, дапоўненыя ўнікальнымі кантрастнымі падборкамі фатаграфій шчаслівых дзяцей мірнага часу і дзяцей ваеннага ліхалецця.

Класіка ваеннай прозы прадстаўлена серыяй “Великая Отечественная”. Яна апавядае пра ўнікальныя чалавечыя лёсы, невядомыя або малавядомыя ваенныя падзеі, інтэрнацыянальны характар подзвігаў, якія здзяйсняліся ў імя Перамогі, а галоўны сэнс твораў – памяць пра тых, хто заваяваў права на неўміручасць самай дарагой цаной – цаной жыцця.

Выстаўка “Шлях мужнасці і славы” – сведчанне патрыятычнага подзвігу беларускага народа ў гады Вялікай Айчыннай вайны, прасякнутае імгненнем мірнага стварэння па ўшанаванні памяці загінулых і ветэранаў, што абаранялі нашу Радзіму.

Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.

Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.

Тэлефон для даведак: (8 017) 293 29 80.