Дата правядзення
Час правядзення
Месца правядзення
Нацыянальная бібліятэка Беларусі працягвае серыю майстар-класаў з удзелам вядомых майстроў народнай творчасці ў рамках выставачнага праекта “Фарфоравае асарці”.
15 і 22 мая а 15-й у выставачным комплексе (пам. 104) адбудуцца сустрэчы з членам Беларускага саюза майстроў народнай творчасці Нінай Шкурдзюк па вырабе дэкаратыўнага пано ў тэхніцы роспісу па шкле.
У падобнай тэхніцы распісвалі дэкаратыўныя шкляныя рамкі для абразоў і сямейных фатаграфій. Сёння роспісам па шкле ў Беларусі займаюцца асобныя майстры. Нягледзячы на тое, што тэхніка многім здаецца складанай, асвоіць яе значна лягчэй, чым маляваць пэндзлем або алоўкам. Разам з Нінай Шкурдзюк вы зможаце азнаёміцца з этапамі стварэння традыцыйнага малюнка на шкле, а таксама прымяніць атрыманыя веды на практыцы і стварыць уласнае пано з характэрнай кампазіцыяй, насычанай каларыстыкай.
Роспіс па шкле (мастацкі вітраж) як адзін з традыцыйных відаў дэкаратыўна-прыкладнога мастацтва сваімі каранямі сыходзіць у эпоху Рэнесансу. На тэрыторыі Беларусі тэхніка пачала распаўсюджвацца ў пачатку ХХ стагоддзя. Малявалі беларусы на прамавугольных кавалках шкла, выкарыстоўваючы празрыстыя каляровыя лакі, алейныя і друкарскія фарбы. Абрысы малюнка спачатку прапрацоўвалі чорнай лініяй, потым залівалі фарбай. У канцы працы мастак падкладаў пад шкло фольгу, што стварала своеасаблівы дэкаратыўны эфект.
Сваімі рукамі можна намаляваць розныя карціны, распісаць вазы, зрабіць арыгінальным шкляны прадмет, які ўпішацца ў любы інтэр’ер. Праца з вітражнымі фарбамі – творчы, дзіўны працэс, здольны надаць малюнку на шкле непаўторны характар. І ўсё гэта можна стварыць сваімі рукамі, выкарыстоўваючы ўсе перавагі фарбаў.
Для ўдзелу ў майстар-класе неабходна:
- абавязкова зарэгістравацца: (8 017) 293 27 50;
- прынесці з сабой рамку для фатаграфіі любога памеру са шклом.
Наведванне майстар-класа ўваходзіць у кошт наведвання выставы “Фарфоравае асарці”:
- для дарослых – 7 руб.
- ля навучэнцаў сярэдніх, сярэдніх спецыяльных і вышэйшых навучальных устаноў – 5 руб.
Час работы выстаўкі адпавядае рэжыму работы бібліятэкі.
Тэлефоны для даведак: (8 017) 368 37 37, 293 27 50.
Матэрыял пададзены галерэйна-выставачным аддзелам.