Дата правядзення
Час правядзення
Месца правядзення
7 красавіка а 17-й гадзіне ў галерэі “Лабірынт” (3-ці паверх) адбудзецца прэзентацыя альбома “ЛітАрт. Знакі беларускага алфавіта”, прысвечанага беларускаму шрыфтавому мастацтву.
Беларусь мае ўнікальную нацыянальную школу графікі і шрыфту, заснаваную на традыцыях выданняў Ф. Скарыны, а таксама на авангардным мастацтве ХХ ст. У наш час узрастае зацікаўленасць і ўвага да праектавання шрыфтоў, тыпаграфікі, каліграфіі, леттэрынгу і адбываецца своеасаблівае адраджэнне “мастацтва літары”. Новы альбом, выдадзены ў 2021 г. выдавецтвам “Беларусь”, падрабязна знаёміць з творчасцю беларускіх графікаў, шрыфтавікоў і каліграфаў з мастацкага аб’яднання “ЛітАрт”.
На старонках альбома чытачы змогуць убачыць адлюстраванне новых тэндэнцый і веянняў беларускага шрыфтавога мастацтва, пераасэнсаваных мастакамі. Выданне ўключае каля 200 яркіх фотаілюстрацый шрыфтавых і графічных кампазіцый. Сярод іх – графічныя серыі і шрыфтавыя плакаты П. Семчанкі, Г. Мацура, С. Саркісава, П. Татарнікава, Ю. Тарэева, У. Свентахоўскага, Р. Найдзена, К. Васюка, Д. Сурскага, “Азбуква” Т. Кулажэнка, шрыфт А. Савіча і А. Кошалева, арт-інсталяцыі А. Міхалевіча, К. Вашчанкі і шмат іншых аўтарскіх напрацовак.
Складальнікамі выдання і аўтарамі грунтоўных мастацтвазнаўчых артыкулаў да яго з’яўляюцца вядомы мастацтвазнавец, першы намеснік старшыні Саюза беларускіх мастакоў Наталля Шаранговіч і мастак-каліграф, прафесар, ініцыятар стварэння аб’яднання “ЛітАрт” Павел Семчанка. Матэрыялы прысвечаны гісторыі і сучаснаму этапу развіцця беларускай шрыфтавой культуры.
Запрашаем на прэзентацыю альбома “ЛітАрт. Знакі беларускага алфавіта” – пераможцы ў намінацыі “Арт-кніга” LXI Нацыянальнага конкурсу “Мастацтва кнігі”.
Тэлефон для даведак: (8 017) 368 37 37.
Матэрыял падрыхтаваны аддзелам сувязей з грамадскасцю.
Глядзіце таксама рэпартаж тэлеканала "Беларусь 1".