Дата правядзення
Час правядзення
Месца правядзення
Да 120-годдзя з дня нараджэння беларускага пісьменніка Віталя Вольскага (1901–1988) у зале беларускай літаратуры (пам. 205) з 2 верасня па 11 кастрычніка праходзіць выстаўка “Пясняр роднага краю”.
Аўтар драматызаваных казак, вядомай камедыі “Несцерка”, значнай колькасці краязнаўчых кніг і цікавых нарысаў, даследчык беларускай літаратуры, перакладчык, нястомны падарожнік – такім ведаюць чытачы Віталя Фрыдрыхавіча Вольскага (сапр. Вольскі-Зэйдэль).
Шматлікія матэрыялы экспазіцыі раскрываюць жыццёвы і творчы шлях пісьменніка.
Упершыню ў друку В. Вольскі выступіў у 1926 годзе з артыкуламі пра тэатральнае мастацтва, фальклор і мову. Даследаваў народную творчасць і старажытную рукапісную літаратуру беларускіх татараў – кітабы. Яму належыць шэраг літаратуразнаўчых прац: “Сучасныя праблемы беларускай савецкай драматургіі”, “Эдуард Самуйлёнак”, “Нарысы па гісторыі беларускай літаратуры эпохі феадалізма”.
Сярод прадстаўленай на выстаўцы літаратуры – таленавітыя п’есы В. Вольскага, створаныя паводле сюжэтаў беларускага фальклору: “Цудоўная дудка”, “Дзед і жораў” і самая папулярная “Несцерка”, якая прынесла славу не толькі яе стваральніку, але і тэатру, і акцёрам. П’еса была пастаўлена ў 1941 годзе Беларускім дзяржаўным драматычным тэатрам імя Я. Коласа і некалькі дзясяткаў год не сыходзіла з яго сцэны. Гэта твор, які займае трывалае месца ў гісторыі беларускай літаратуры.
Беларускую літаратуру для дзяцей і падлеткаў узбагацілі кнігі прыродазнаўчых нарысаў і апавяданняў В. Вольскага. Аўтар даносіць да дзяцей жывое дыханне прыроды, узбагачае іх духоўна, дапамагае сэрцам адчуваць, “які цудоўны свет і якая прыгожая наша краіна – Беларусь”. На выстаўцы экспануюцца “У лясах над Бярозай”, “Месяц за месяцам”, “Чайкі над Нараччу”, “Падарожжа па краіне беларусаў” і іншыя зборнікі.
Нястомны падарожнік В.Ф. Вольскі наведаў краіны афрыканскага кантыненту: Сенегал, Бераг Слановай Косткі, Гвінею, Туніс, Марока. У выніку паездак з’явіліся нарысы “Афрыканскае падарожжа”, “Эль Махрыб”, “Пад небам Афрыкі”.
Да ўвагі наведвальнікаў і перакладчыцкая дзейнасць Віталя Вольскага. Дзякуючы яму на беларускай мове загучалі сатырычная паэма І.В. Гётэ “Рэйнеке-Ліс”, раманы В. Брэдэля “Выпрабаванне”, М. Кульбака “Зельманцы” і іншыя творы замежных аўтараў.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.
