Пісаць жыццё літаратуры

З 5 кастрычніка па 7 лістапада ў зале беларускай літаратуры (пам. 205) праходзіць выстаўка “Пісаць жыццё літаратуры”, прымеркаваная да 70-годдзя Таццяны Іванаўны Шамякінай.

Дачка беларускага пісьменніка Івана Пятровіча Шамякіна, Таццяна Іванаўна – вядомы беларускі літаратуразнавец, крытык, перакладчык, выдатнік адукацыі. Даследуе беларускую міфалогію ў кантэксце сусветнай, у сувязі з літаратурай і фальклорам, праблемы сучаснай беларускай прозы, асаблівасці стылю такіх беларускіх пісьменнікаў, як Я. Колас, А. Васілевіч, І. Пташнікаў, М. Стральцоў і іншых.

Наведвальнікі выстаўкі маюць магчымасць пазнаёміцца з шматлікімі працамі Таццяны Іванаўны, сярод якіх манаграфіі “На лініі перасячэння”, “Беларуская класічная літаратура і міфалогія”, а таксама артыкулы па праблемах тэорыі і гісторыі літаратуры, міфалогіі, фалькларыстыкі, гісторыі сусветнай культуры. Аўтара цікавіць сувязь культур, у сваіх даследаваннях яна выказвае гіпотэзы, цікавыя дапушчэнні, што тычацца міфалагічнай спадчыны еўрапейскіх і азіяцкіх народаў. Прыкладам таму з’яўляюцца прадстаўленыя ў экспазіцыі “Кітайскі каляндар і славянскі міфалагічны бестыярыум”, “Культура Кітая”, “Культура Індыі”.

Таццяна Іванаўна шмат працуе над вывучэннем творчасці свайго бацькі, перакладае яго творы на рускую мову. З асобай цеплынёй яна піша пра Івана Пятровіча, яго сяброў, пра родныя для іх сям’і мясціны.

Асобна экспануюцца падручнікі і вучэбныя дапаможнікі па беларускай літаратуры для школ з паглыбленым і профільным вывучэннем беларускай літаратуры, ліцэяў, каледжаў, гімназій і ВНУ. У прадстаўленых выданнях Т.І. Шамякіна выступае як аўтар ці суаўтар.

Час работы выстаўкі адпавядае рэжыму работы бібліятэкі.
Уваход – па чытацкім білеце ці білеце сацыякультурнага цэнтра бібліятэкі.

Тэлефон для даведак: (8 017) 293 27 16.