75-годдзю Перамогі ў Вялікай Айчыннай вайне прысвячаецца новы праект Нацыянальнай бібліятэкі Беларусі – “100 дзён да Вялікай Перамогі. Па старонках беларускіх газет 1945 г.”.
З 30 студзеня па 9 мая 2020 г. штодня на партале бібліятэкі публікуюцца матэрыялы, якія адлюстроўваюць хроніку навін і падзей з публікацый адпаведнага перыяду ў газетах Савецкай Беларусі 1945 г.
Узяты нямецкі арсенал. Навіны з розных раёнаў Беларусі. Завяршыўся кубак па хакеі. Газеты: «Звязда» (№ 34) і «Совецкая радзіма» (№ 26).
Савецкія войскі працягвалі выконваць сваю ваенную працу – наступалі, атачалі, бралі ў палон, ліквідавалі асяродкі супраціўлення. У перадавым артыкуле газеты «Звязда» (№ 34), прысвечаным святу Савецкай арміі, – прадстаўлены агляд поспехаў Чырвонай арміі, якім адпавядаюць дасягненні прадпрыемстваў у тылавой Беларусі.
Перадрукаваны цікавы рэпартаж карэспандэнта «Правды», які пабываў у адным з нямецкіх падземных арсеналаў. Наша армія настолькі хутка наступала, а танкавы ўдар у накірунку сховішча зброі быў такі раптоўны, што ахоўнікі, уцякаючы, пакінулі на стале недапісаны ліст, адрасаваны невядомай Луізе, акуратна раскладзеную ежу і нават не паспелі ўключыць рубільнік, каб замініраваны арсенал узляцеў у паветра.
З розных абласцей і раёнаў Беларусі перадаюць разнастайныя навіны. У Асіповіцкім раёне 8 будаўнічых брыгад адбудоўваюць у вёсках жылыя дамы; у Бабруйскім раёне ў адным з калгасаў адкрыта лякарня для коней («Совецкая радзіма» № 26). З Мазыра паведамляюць, што нядаўна пры Хойніцкім райзямаддзеле завяршылі курс навучання будучыя садаводы.
Побач, у суседняй калонцы, – фота лепшага токара Мінскага рамонтна-механічнага завода, які вырабляе дэталі будучага трактара. З Васілевічаў перадаюць, што ў некаторых калгасах паўторна ачысцілі пасяўны матэрыял. Рэкамендуецца новы метад пасадкі бульбяных клубняў, прапанаваны ў 1943 годзе акадэмікам Т.Д. Лысенкам – заснавальнікам і найбуйнейшым прадстаўніком псеўданавуковага напрамку ў біялогіі – мічурынскай аграбіялогіі («Звязда» № 34). Цікава, ці апраўдаў сябе гэты метад або пазней быў прызнаны памылковым? У Клічаўскім раёне да абласнога агляду самадзейнасці калектывы развучваюць беларускія народныя песні і танцы, песні савецкіх кампазітараў («Звязда» № 34).
Кубак БССР па хакеі (пра пачатак якога было напісана ў навіне ад 4 лютага – заўв. аўтара) завяршыўся, аўтар нататкі на 4-й старонцы газеты «Звязда» пералічыў гарады-ўдзельнікі спаборніцтва, назваў пераможцу і лік фінальнага матчу (6:0), тут жа прадстаўлена фота, на якім адлюстраваны востры момант гульні.
А да Перамогі заставалася 79 дзён...
Аўтар публікацыі: Л. Тупчыенка-Кадырава, аддзел карпаратыўнага ўзаемадзеяння.
Усе матэрыялы праекта даступны на партале НББ і сайце “Беларусь у інфармацыйнай прасторы”.
