75-годдзю Перамогі ў Вялікай Айчыннай вайне прысвячаецца новы праект Нацыянальнай бібліятэкі Беларусі – “100 дзён да Вялікай Перамогі. Па старонках беларускіх газет 1945 г.”.
З 30 студзеня па 9 мая 2020 г. штодня на партале бібліятэкі публікуюцца матэрыялы, якія адлюстроўваюць хроніку навін і падзей з публікацый адпаведнага перыяду ў газетах Савецкай Беларусі 1945 г.
Тэатральныя пастаноўкі. Кароткія навіны з розных абласцей Беларусі. Анонсы культурных мерапрыемстваў. Газеты: "Звязда" (№ 31), "Віцебскі рабочы" (№ 17).
У гэтыя лютаўскія дні ў Беларусі адбылася значная культурная падзея – пасля трохгадовага перапынку абноўлены Дзяржаўны рускі драматычны тэатр БССР (цяпер – Нацыянальны акадэмічны драматычны тэатр імя М. Горкага) у Мінску прыступіў да актыўнай творчай дзейнасці. Адзін з лепшых тэатраў рэспублікі паказаў магілёўскаму гледачу вадэвіль У. Дыхавічнага "Вясельнае падарожжа", пастаноўку па апавяданні Ф. Кнорэ "Сустрэча ў цемры" , камедыю "Свая сям'я, або Замужняя нявеста" А. Шахоўскага, А. Грыбаедава і М. Хмяльніцкага. У бліжэйшых планах – пастаноўка п'ес рускай і сусветнай класікі ("Звязда", № 31).
А ў Беларускім дзяржаўным тэатры імя Якуба Коласа (цяпер – Нацыянальны акадэмічны драматычны тэатр імя Якуба Коласа) у Віцебску пастаўлена новая п'еса К. Крапівы "Проба агнём", напісаная ім ў 1943 г.; яе прэм'еру трупа паказала яшчэ ў эвакуацыі. Ролі выконвалі вядучыя артысты Беларусі П. Малчанаў, А. Радзялоўская, А. Шэлег ("Віцебскі рабочы", № 17).
З рубрыкі "Коратка" ў газеце "Звязда" (№ 31) пералічым некаторыя звесткі: у Палескай вобласці працуе 22 дзіцячыя садкі і 5 ясляў, хутка адкрыецца яшчэ некалькі; у гарадах Гомельскай вобласці закладзена некалькі інкубатарных станцый для вырошчвання куранят; у раённым цэнтры Ветрына Віцебскай вобласці (цяпер у складзе Полацкага раёна) хуткімі тэмпамі адраджаецца сетка культурна-асветных устаноў – нядаўна адкрылася 5 клубаў, 11 хат-чытальняў, 26 чырвоных куткоў. Па ўсёй Беларусі арганізаваны розныя курсы: у Полацкай вобласці рыхтуюць 800 будучых механізатараў, у Брэсцкай – настаўнікаў пачатковых класаў, у Мінску – рахункаводаў. Сярод анонсаў культурнай праграмы – першая серыя кінафільма С. Эйзенштэйна "Іван Грозы", опера "Алеся" Я. Цікоцкага, канцэрт народнай артысткі БССР і СССР Л. Александроўскай.
Да Перамогі засталося 83 дні...
Аўтар публікацыі: Л. Тупчыенка-Кадырава, аддзел карпаратыўнага ўзаемадзеяння.
Усе матэрыялы праекта даступны на партале НББ і сайце “Беларусь у інфармацыйнай прасторы”.