75-годдзю Перамогі ў Вялікай Айчыннай вайне прысвячаецца новы праект Нацыянальнай бібліятэкі Беларусі – “100 дзён да Вялікай Перамогі. Па старонках беларускіх газет 1945 г.”.
З 30 студзеня па 9 мая 2020 г. штодня на партале бібліятэкі публікуюцца матэрыялы, якія адлюстроўваюць хроніку навін і падзей з публікацый адпаведнага перыяду ў газетах Савецкай Беларусі 1945 г.
Падрыхтоўка да веснавых палявых работ. Выкананне планаў па раёне. Адкрылася хата-чытальня. Газета “Чырвоны сцяг” (Давыд-Гарадоцкі раён) (№ 7).
У 7-м нумары газеты “Чырвоны сцяг” вітаецца ўзяцце нашымі войскамі Будапешта. (Газета “Чырвоны сцяг” выходзіла ў Давыд-Гарадоцкім раёне Пінскай вобласці, цяпер тэрыторыя раёна знаходзіцца ў складзе Столінскага раёна Брэсцкай вобласці).
“Франтавое заданне выканана” – пад такім загалоўкам работнікі раёна ў адказ на перамогі Чырвонай Арміі зрабілі справаздачу аб сваіх справах – “усенароднай дапамогай фронту”. Так, план першага квартала 1945 года па падрыхтоўцы і вывазцы лесу ў некаторых сельсаветах выкананы на 104–120 працэнтаў, а план 1944 года па будаўніцтву мастоў у раёне перавыкананы на 591 працэнт!
Актыўна ідзе падрыхтоўка да веснавых палявых работ – неабходна падрыхтаваць насенне і інвентар, разлічыць цяглавую сілу. Праца ўскладняецца тым, што большая частка рабочых коней і валоў была сагнана ў Нямеччыну, інвентар спалены. Таксама яшчэ не ва ўсіх сельсаветах жыхарам вернуты зямельныя ўчасткі, адабраныя ў іх пры немцах. Газета нагадвае: нягледзячы на ўсе цяжкасці, план веснавой пасяўной павінен быць выкананы. У хуткім часе пачне працаваць мясцовая радыёстанцыя – абсталяванне для яе ўжо ўстаноўлена. На дадзены момант да раённага радыёвузла падключаны 142 пункты, 2 рэпрадуктары ўстаноўлены на базарнай плошчы і ў цэнтры Давыд-Гарадка. Апошнія навіны ў сельскія саветы раёна перадаюцца па тэлефоне, а далей, жыхарам вёсак, – па ўстаноўленых рэпрадуктарах. (Сёння, з нашай зручнай інтэрнэт- і тэлефоннай прасторы нам цяжка ўявіць такую камунікацыю! – заўв. аўт.).
Не абыдзем увагай навіны культуры і бібліятэчнай справы. Толькі што скончыўся агляд мастацкай самадзейнасці сярод школ. А ў вёсцы Альпень Веляміцкага сельсавета на Брэстчыне адкрылася хата-чытальня, укамплектаваная газетамі і кнігамі.
84 дні засталося да Перамогі...
Аўтар публікацыі: Л. Тупчыенка-Кадырава, аддзел карпаратыўнага ўзаемадзеяння.
Усе матэрыялы праекта даступны на партале НББ і сайце “Беларусь у інфармацыйнай прасторы”.