З 30 студзеня па 9 мая 2020 г. кожны дзень на партале Нацыянальнай бібліятэкі Беларусі публікаваліся матэрыялы, якія адлюстроўвалі навіны і падзеі, што адбыліся 75 гадоў таму.
Вось і пройдзены наш 100-дзённы інфармацыйны шлях да Перамогі. Газеты і кнігі савецкай Беларусі, сучасныя кніжныя і адкрытыя крыніцы далі нам магчымасць акунуцца ў атмасферу тых далёкіх дзён – яшчэ трывожную, бо вайна працягвалася, але ўжо і поўную энтузіязму з-за блізкасці яе канца. Нам сталі больш зразумелымі клопаты і цяжкасці франтавікоў – былых рабочых, служачых, сялян, студэнтаў – і жыхароў тыла, якія з першых дзён вызвалення пачалі аднаўляць прадпрыемствы Беларусі, араць палі, сеяць і збіраць ураджай, адбудоўваць разбураныя і спаленыя хаты, праводзіць навуковыя даследаванні і вучыцца. Але яны працягвалі радавацца жыццю – хадзілі на спартыўныя спаборніцтвы, у кіно і тэатры.
У гэтым агульным ўздыме ўдзельнічалі і бібліятэкі. Ім давялося зноў станавіцца патрэбнымі і запатрабаванымі – і не толькі для спецыялістаў навукі і народнай гаспадаркі, але і тых, хто хацеў проста пачытаць добрую мастацкую літаратуру.
Многае з таго, што адбылося 75 гадоў таму напярэдадні пераможнага 9 мая, стала нам больш зразумелым, а нешта засталося неразгаданым. Але засталося наша захапленне тымі людзьмі – ад салдата да маршала, ад простага працаўніка да партыйнага кіраўніка: яны змаглі! яны перамаглі!
Трохі сумна расставацца з праектам. Дзякуем усім, хто прымаў удзел у яго арганізацыі, стварэнні, публікацыі, папулярызацыі і падтрымцы. Дзякуй усім, хто чытаў навіны 1945 года на нашым партале або ў спецыяльным раздзеле сайта “Беларусь у інфармацыйнай прасторы”, хто ставіў лайкі на старонцы праекта ў Фэйсбуку і стужках іншых сацыяльных сетак.
Год, прысвечаны 75-годдзю ВЯЛІКАЙ Перамогі ў ВЯЛІКАЙ Айчыннай вайне, – працягваецца!
З павагай, аддзел карпаратыўнага ўзаемадзеяння.
