У красавіку 2023 года сваё сямідзесяцігоддзе адзначае часопіс “Маладосць”, штомесячнае літаратурна-мастацкае і грамадска-палітычнае ілюстраванае выданне, якое стала сапраўднай школай мастацкай і публіцыстычнай славеснасці, выхавала некалькі пакаленняў беларускіх паэтаў, пісьменнікаў, крытыкаў і літаратуразнаўцаў.
Ініцыятарам стварэння “Маладосці” выступіў Цэнтральны камітэт Ленінскага камуністычнага саюза моладзі Беларусі, першым сакратаром якога ў той час быў П.М. Машэраў. Ужо сама назва падказвае, для каго створаны часопіс. Першы нумар выйшаў у сярэдзіне красавіка 1953 г. Надрукаваны ў ім зварот “Да моладзі” народнага пісьменніка Якуба Коласа пацвярджаў накіраванасць часопіса на асвятленне жыцця, працоўнай і творчай дзейнасці маладога пакалення Беларусі. Менавіта такое выданне і было запатрабавана часам. У ім публікаваліся творы маладых пісьменнікаў – вершы, паэмы, апавяданні, раманы. Такім чынам часопіс адкрываў дарогу да чытача многім пачынаючым літаратарам. Сярод іх А. Разанаў, Я. Янішчыц, Ю. Голуб, В. Шніп, Л. Рублеўская, М. Мятліцкі, А. Бадак, С. Законнікаў, творы якіх пазней увайшлі ў залаты фонд айчыннай літаратуры. “Маладосць” таксама дапамагла раскрыцца таленавітым фатографам А. Дзітлаву і В. Ждановічу.
На старонках часопіса друкаваліся і пісьменнікі старэйшага пакалення: Якуб Колас, М. Лынькоў, П. Глебка і інш. Аўтарамі выступалі таксама грамадскія і дзяржаўныя дзеячы, навукоўцы, чытачы. Размяшчаліся публіцыстычныя, крытычныя і літаратуразнаўчыя артыкулы, рэцэнзіі, фотарэпартажы, ілюстрацыі і рэпрадукцыі твораў выяўленчага мастацтва; матэрыялы на навуковыя, грамадска-палітычныя і гістарычныя тэмы; нарысы пра дзеячаў навукі, культуры, літаратуры і мастацтва, перадавікоў вытворчасці; пераклады літаратурных твораў народаў СССР і замежных краін.
З 1988 г. часопіс пачаў выдаваць серыю “Бібліятэка часопіса «Маладосць»”, у якой друкаваліся і працягваюць друкавацца дэбютныя кнігі беларускіх пісьменнікаў.
Першым рэдактарам “Маладосці” быў А. Кулакоўскі, які да гэтага працаваў у рэдакцыях часопіса “Беларусь” і газеты “Літаратура і мастацтва”. Пазней ім кіравалі П. Панчанка, В. Зуёнак, Г. Бураўкін, у ім працавалі Я. Сіпакоў, М. Стральцоў, Я. Брыль, М. Аўрамчык.
На працягу ўсёй сваёй гісторыі “Маладосць” з’яўлялася аўтарытэтным выданнем, пляцоўкай, якая аб’ядноўвала маладых паэтаў і пісьменнікаў, літаратараў і публіцыстаў, перакладчыкаў і крытыкаў. Гэту функцыю часопіс выконвае і сёння, прыкладаючы, па меркаванні беларускага літаратуразнаўца, крытыка і пісьменніка У. Гніламёдава, намаганні “…для таго, каб адчыніць дарогу талентам”. Рэдакцыя выдання дае магчымасць маладым аўтарам увайсці ў літаратурнае жыццё. Дапамагаючы ім зрабіць першыя крокі ў літаратуры, яна адначасова стварае высокамастацкае, інтэлектуальнае, духоўнае чытанне для маладых людзей, незалежна ад роду іх заняткаў, імкнецца даць жыццё новым ідэям, якія адказваюць на выклікі часу.
Пазітыўны імідж, выдатны дызайн, высакаякасны кантэнт – такім часопіс “Маладосць” сустракае свой юбілей.
Інфармацыю пра часопіс “Маладосць” можна знайсці ў анлайн-энцыклапедыі “Беларусь у асобах і падзеях”. Бібліяграфічныя звесткі на выпускі перыядычнага выдання, на публікацыі, прысвечаныя часопісу, змяшчае электронны каталог Нацыянальнай бібліятэкі Беларусі.
Глядзіце таксама: Архіў часопіса “Маладосць”.
Матэрыял падрыхтаваны навукова-даследчым аддзелам бібліяграфіі.
