27 чэрвеня прайшоў круглы стол, прысвечаны 130-годдзю з дня нараджэння І. Луцкевіча і 90-годдзю заснавання Віленскага беларускага гісторыка-этнаграфічнага музея імя І. Луцкевіча.
Іван Іванавіч Луцкевіч (1881–1919) – палітычны дзеяч, археолаг, этнограф, публіцыст, адзін з пачынальнікаў і ідэйных кіраўнікоў беларускага культурна-асветніцкага і грамадска-палітычнага руху на пачатку ХХ ст. Ён – збіральнік і даследчык беларускіх старажытнасцей Асабістая калекцыя І. Луцкевіча стала асновай Віленскага беларускага гісторыка-этнаграфічнага музея, які існаваў у 1921–1945 гг.
Пасля закрыцця музея большасць збораў была перададзена ў Гісторыка-этнагафічны музей Літвы, Цэнтральную бібліятэку Акадэміі навук Літвы, частка з іх трапіла ў музейныя зборы Беларусі.
Шматгранная дзейнасць І. Луцкевіча знайшла адлюстраванне ў навуковых і публіцыстычных выданнях па гісторыі, мастацтве, кніжнай культуры Беларусі, аказала значны ўплыў на творчасць Я. Купалы, Я. Коласа, М. Багдановіча і іншых беларускіх пісьменнікаў і паэтаў. Размова пра гэта вялася на выстаўцы “Спадчына, якая належыць Беларусі”, прысвечанай 115-годдзю з дня нараджэння І. Луцкевіча і 75-годдзю з часу заснавання Беларускага музея імя І. Луцкевіча (Нацыянальны музей гісторыі і культуры Беларусі, 1996).
У пасяджэннях круглага стала, які ладзіўся ў Нацыянальным гістарычным музеі Рэспублікі Беларусь (НГМ РБ), узялі ўдзел і выступілі з паведамленнямі: Сяргей Вечар (дырэктар НГМ РБ), Алесь Суша (вучоны сакратар Нацыянальнай бібліятэкі Беларусі), Анатоль Літвіновіч (дацэнт БДПУ імя М. Танка), Ганна Запартыка (дырэктар Беларускага дзяржаўнага архіва-музея літаратуры і мастацтва), Юрый Лаўрык (вядучы навуковы супрацоўнік НГМ РБ), Анатоль Сідарэвіч (даследчык), Валерый Герасімаў (загадчык аддзела Прэзідэнцкай бібліятэкі Рэспублікі Беларусь), Надзея Саўчанка (загадчык аддзела НГМ РБ), Людміла Талкачова (навуковы супрацоўнік НГМ РБ), Аляксандр Анушэнка (навуковы супрацоўнік НГМ РБ).
Пад апекай намесніка дырэктара Нацыянальнага гістарычнага музея Рэспублікі Беларусь Ніны Калымагі быў абмеркаваны і падтрыманы ўдзельнікамі выніковы дакумент круглага стала, у якім дадзена ацэнка зробленаму за апошнія гады ў вывучэнні спадчыны колішняга Віленскага беларускага музея, а таксама намечаны перспектыўныя напрамкі далейшай працы.
Вынікі працы ўдзельнікаў круглага стала мусяць пабачыць свет у чарговым нумары “Музейнага весніка”, які рыхтуе Нацыянальны гістарычны музей Рэспублікі Беларусь.
