Цэнтральная гомельская гарадская бібліятэка імя А. І. Герцэна запрасіла гледачоў на акцыю “Бібліяноч”.
Бібліятэку было проста не пазнаць. На 1-м паверсе, у аддзеле абанемента, размясцілася экспазіцыя “Расія 1920-х гадоў”. У суседняй зале можна было пасядзець на 12 крэслах, а таксама пагутарыць з Астапам Бэндэрам, Элачкай Людаедкай і Мадам Грыцацуевай, узяць удзел у латарэі “12 крэслаў” і адпачыць у кавярні “Лепшы сябар страўніка”.
Падняўшыся на 2-гі паверх, госці апыналіся на сядзібе каля Дзіканькі, маглі пачаставацца ў Салохі, прагуляцца з Аксанай і праспяваць украінскія песні. Вядома, не абышлося без нацыянальнага далікатэсу: шчодрая Салоха частавала гасцей смачным салам. А побач працаваў прасторавы партал з Украіны непасрэдна ў Швецыю. На адным са стакгольмскіх дахаў сядзелі Малыш і Карлсан. Яны хаваліся ад Фрэкен Бок, якая велічна ўладкавалася за стойкай. Зрэшты, яна была зусім не страшнай: частавала ласункамі і з задавальненнем распавядала пра кніжныя навінкі.
На 3-ім паверсе можна было апынуцца “на прызбе з Васілём” і паслухаць байкі гомельскага пісьменніка Васіля Ткачова, а таксама наведаць кірмаш рамеснікаў і паўдзельнічаць у майстар-класах па пляценні з лазы і выкананні керамічных вырабаў.
Для аматараў вострых адчуванняў былі арганізаваны экстрым-туры ў бібліятэчныя сутарэнні “Лабірынт жахаў”.
Вядомы гомельскі астраном Уладзімір Ларыёнаў расказаў пра зоркі.
Далей адбылося адкрыццё выстаўкі мастака Уладзіслава Ціханава.
А потым удзельнікаў бібліяночы чакаў спектакль абласнога драматычнага тэатра “Уладар народных дум і песень” па матывах твораў Янкі Купалы.
А яшчэ ў праграме акцыі былі буктрэйлеры, караоке, “кніжныя далікатэсы”, латарэі, інтэрнэт-кафэ, міні-бар, кансультацыі бібліятэрапеўта, літаратурныя квесты, “свежая прэса для экспрэса”, буккросінг, фотасесіі і майстар-класы.
Аўтар публікацыі: Наталля Іванова.
Крыніца: газета “Літаратура і мастацтва”
Чытайце таксама:
