Павел Гушынец. “Прыгоды Букі Злюкі: у пошуках козы Ностры”
У кнізе апісваюцца займальныя прыгоды Букі Злюкі. З бліскучым гумарам аўтар распавядае пра шматлікія перыпетыі галоўнай гераіні, якая ў пошуках бабулінай козы Ностры знаходзіць сяброў і даведваецца вельмі шмат новага. Кніга будзе цікавая як дзецям, так і іх бацькам.
Для дзяцей сярэдняга школьнага ўзросту.
Кацярына Хадасевіч-Лісавая “Жахліўчык пра трох сяброў і прывід з хутара”
Кніга-перакрутка распавядзе чытачам дзве страшныя гісторыі. Адна з іх адбылася з кампаніяй дзяўчатак, а другая – з хлапчуковым хаўрусам. Пазнаёміцца з жахліўчыкамі могуць самыя смелыя, бо толькі яны здолеюць дачытаць да канца і не будуць баяцца выключаць святло на ноч.
Што бывае, калі чатыры сяброўкі застаюцца начаваць у кватэры без дарослых? Дзяўчаткі могуць весяліцца, зладзіць вечарынку, не спаць паўночы. Усё так, але ў той гісторыі няўрымслівыя паненкі выпадкова сустрэліся з загадкавай асобай, якая пасля поўначы нагнала на іх сапраўдны жах, бо яна была… Аб усіх падрабязнасцях можна даведацца, прачытаўшы кнігу. Калі толькі вы не з баязлівых, сябры.
А з хлопчыкамі адбылася містычная гісторыя, калі яны адпачывалі летам у вёсцы. І папярэджвалі ж мясцовыя жыхары, што небяспечна спрабаваць даведацца таямніцу, якую хавае ад людзей старажытны курган… А калі цікаўнасць пераважае над асцярожнасцю, пачынаюцца прыгоды, ад якіх пераймае дух і замірае сэрца!
Інэса Плескачэўская “Без «железного занавеса»”
Кніга “Без «железного занавеса»” створана на аснове аднайменнага праекта, які на працягу 2014–2019 гадоў публікаваўся ў газеце “СБ. Беларусь сегодня”.
Аўтар пабывала ў Германіі (былой ГДР), Чэхіі і Славакіі (былой Чэхаславакіі), Венгрыі, Польшчы, Балгарыі і Румыніі, сустракалася з рознымі людзьмі: кiраўнiкамi дзяржаў і ўрадаў у той час, бізнесменамі, эканамістамі, артыстамі і мастакамі, простымі жыхарамі.
Гэта – кніга пра кардынальныя змены ва Усходняй Еўропе, пра тое, як змяніліся палітыка, эканоміка, культура і жыццё простых людзей. Гэта аповед з першых вуснаў пра тое, як гэта было – жыць у эпоху пераменаў, пра тое, што было пасля, пра надзеі, радасці, перамогі, расчараванні і “паслясмак” рэвалюцыі.
Эсміра Ісмаілава “Амаль. Прынцэса Сельвы”
Гэта казачная аповесць аб дзіўным месцы, роўнага якому па прыгажосці ў свеце няма. У самым сэрцы непраходных джунгляў у індзейскім племені жыве дзяўчынка па імені Амаль. Яна смелая і адважная, добрая і вельмі смешная. І кожны дзень прыносіць ёй новыя прыгоды – неверагодныя і захапляльныя. Гэты твор, поўны дакладных апісанняў таямнічых лясоў Амазоніі, можа стаць тонкім правадніком для дзяцей і іх бацькоў у свет дзікай прыроды і натуральнай прыгажосці.
Для дзяцей сярэдняга школьнага ўзросту.
Крыніца: Звязда
