Літаратурны музей “Знакамітыя пісьменнікі Гомельшчыны” папоўніўся новымі экспанатамі.
Дачка Барыса Сачанкі Святлана для музейнай экспазіцыі “Светлы і шчодры талент”, прысвечанай яе бацьку, перадала ў дар бібліятэцы ўнікальныя матэрыялы.
Вялікі інтарэс прадстаўляе творчая лабараторыя пісьменніка, яго рукапісы, ужо выдадзеныя кнігі з аўтарскімі праўкамі, блакнот з асабістымі запісамі, картатэка надрукаваных твораў пісьменніка і яго выступленняў, лісты ад маці, а таксама кнігі з аўтографамі на памяць Барысу Сачанку ад Рыгора Барадуліна, Максіма Танка, Міколы Аўрамчыка, Васіля Зуёнка і многіх іншых.
Каштоўнымі экспанатамі з’яўляюцца асабістыя рэчы пісьменніка: капялюш, кашулі, гальштукі, пячатка з экслібрысам для асабістай бібліятэкі пісьменніка, членскія білеты “Союз писателей СССР” і “Литературный фонд СССР”, юбілейныя медалі “50 гадоў Перамогі ў Вялікай Айчыннай вайне” і «За доблестный труд» в ознаменование 100-летия со дня рождения Владимира Ильича Ленина», а таксама фотаздымкі з сямейнага альбома.
Зусім хутка ўсе гэтыя экспанаты зоймуць сваё пачэснае месца ў музейнай экспазіцыі Барыса Сачанкі, лаўрэата Дзяржаўнай прэміі імя Якуба Коласа, Літаратурнай прэміі СП Беларусі імя Івана Мележа.
Крыніца: Гомельская абласная ўніверсальная бібліятэка імя У.І. Леніна