7–8 чэрвеня ў Вільнюсе прайшоў Міжнародны навуковы семінар “Праблемы вывучэння культурнай спадчыны Вялікага княства Літоўскага”, у якім удзельнічаў вучоны сакратар Нацыянальнай бібліятэкі Беларусі А. Суша.
Арганізатарам мерапрыемства выступіла Асацыяцыя даследчыкаў дыялогу моў і культур Еўропы.
Міжнародны характар семінара быў падкрэслены выступленнямі даследчыкаў кніжнай культуры з Беларусі, Літвы, Польшчы, Расіі і Украіны – краін, якія лічацца спадчыннікамі Вялікага Княства Літоўскага, у свой час буйнейшай дзяржавы Еўропы. У рабоце семінара таксама ўзяў удзел шырокі круг спецыялістаў, якія працуюць у буйнейшых бібліятэках Літвы, супрацоўнікаў Літоўскай акадэміі навук, выкладчыкаў Вільнюскага ўніверсітэта, магістрантаў і дактарантаў.
Значную цікавасць сярод удзельнікаў семінара выклікаў даклад вучонага сакратара Нацыянальнай бібліятэкі Беларусі А. Сушы “Вынікі рэалізацыі беларускімі бібліятэкамі навукова-праектных работ у сферы вывучэння і папулярызацыі кніжнай спадчыны Вялікага Княства Літоўскага”. Прысутныя змаглі азнаёміцца з дзейнасцю бібліятэкі ў галіне захавання, вывучэння і папулярызацыі нацыянальнай дакументальнай спадчыны Беларусі. Акрамя таго, ім былі прадстаўлены ўзоры выдавецкай прадукцыі Нацыянальнай бібліятэкі Беларусі.
У рамках правядзення міжнароднага семінара таксама адбыўся шэраг сустрэч з прадстаўнікамі кіраўніцтва Бібліятэкі Урублеўскіх Літоўскай акадэміі навук. Удзельнікі мерапрыемстваў выявілі зацікаўленасць у сумеснай дзейнасці ў галіне фарміравання электронных інфармацыйных рэсурсаў і рэалізацыі навукова-праектных работ.
Дастаткова падрабязна была прадстаўлена дзейнасць Бібліятэкі Урублеўскіх Літоўскай акадэміі навук па вывучэнні, алічбоўцы і забеспячэнні захаванасці каштоўных рукапісных і друкаваных помнікаў.
Перагаворы з дырэктарам Цэнтра бібліяграфіі і кнігазнаўства Літоўскай нацыянальнай бібліятэкі імя М. Мажвідаса спадарыняй Р. Варнене-Янсен дазваляюць спадзявацца на актывізацыю супрацоўніцтва бібліятэк Беларусі і Літвы ў галіне распрацоўкі нацыянальных электронных бібліятэк, навуковага ўзаемадзеяння.
 |
 |
 |
