Калектыў Нацыянальнай бібліятэкі Беларусі віншуе заслужанага дзеяча культуры Рэспублікі Беларусь Галіну Мікалаеўну Алейнік з юбілеем!
Уся працоўная дзейнасць Г.М. Алейнік была прысвечана служэнню кнізе, бібліятэцы. Асноўную і галоўную частку свайго прафесійнага шляху Галіна Мікалаеўна прайшла ў Нацыянальнай бібліятэцы Беларусі. Найвышэйшы прафесіяналізм, бліскучае веданне кнігі, абвостранае пачуццё новага, прагрэсіўнага былі выяўлены ёю ў перыяд працы на пасадзе галоўнага бібліятэкара, загадчыка аддзела, намесніка дырэктара, а з 1990 г. больш за 12 гадоў – дырэктара галоўнай бібліятэкі краіны.
Тут у поўнай меры раскрыўся яе творчы патэнцыял, выдатныя арганізатарскія якасці, стваральная энергія, розум і воля кіраўніка. Пры яе ўдзеле і пад яе непасрэдным кіраўніцтвам імкліва змянялася аблічча бібліятэкі як нацыянальнага інфармацыйнага цэнтра, умацоўваўся міжнародны аўтарытэт. Актыўна вялася распрацоўка аўтаматызаванай бібліятэчнай інфармацыйнай сістэмы рэспублікі, стварэнне адзінай інфармацыйнай інфраструктуры, якая спрыяла ўзаемадзеянню бібліятэк усіх сістэм і ведамстваў, пачалася распрацоўка праекта новага будынка Нацыянальнай бібліятэкі Беларусі, а затым і яго будаўніцтва.
Найглыбейшая адказнасць, высокая патрабавальнасць да сябе спалучаліся ў Г.М. Алейнік з чуласцю, уважлівым і беражлівым стаўленнем да людзей. Гармонія выдатных прафесійных і асабістых якасцей спрыяла яе бясспрэчнаму аўтарытэту ў бібліятэчнай супольнасці краіны, сярод калег блізкага і далёкага замежжа.
Цярпеннем, шчырасцю і добразычлівасцю заўсёды была прасякнута праца Г.М. Алейнік на грамадскіх пасадах – у Беларускім фондзе культуры, у Камісіі па справах ЮНЕСКА пры Міністэрстве замежных спраў Рэспублікі Беларусь, на пасадзе прэзідэнта Беларускай бібліятэчнай асацыяцыі.
Па-падзвіжніцку мудрае служэнне на ніве асветніцтва і культуры, усё створанае Галінай Мікалаеўнай Алейнік на прафесійнай ніве паставіла яе ў шэраг лепшых прадстаўнікоў беларускай інтэлігенцыі.
Мы ганарымся Вамі, Галіна Мікалаеўна, дзякуем Вам за шматгадовае высакароднае служэнне Нацыянальнай бібліятэцы Беларусі і жадаем моцнага здароўя і шчаслівага, актыўнага даўгалецця!
Калектыў Нацыянальнай бібліятэкі Беларусі