З 5 па 24 сакавіка ў зале нотных і аўдыядакументаў (пам. 305) арганізавана выстаўка “Настаўнік і творца”, прысвечаная 140-годдзю з дня нараджэння Васіля Андрэевіча Залатарова (1872–1964).
Творчасць В.А. Залатарова – кампазітара, тэарэтыка, педагога, прафесара, народнага артыста Беларусі і заслужанага артыста Расіі – яркая старонка ў гісторыі савецкай музычнай культуры. Пераемна звязаны ў сваёй творчасці з традыцыямі рускай класічнай музыкі, кампазітар у той жа час многае запазычыў у музычным фальклоры іншых народаў – беларускага, украінскага, малдаўскага, яўрэйскага, узбекскага, таджыкскага і туркменскага.
З імем прафесара В.А. Залатарова звязана ў асноўным фарміраванне і станаўленне беларускай нацыянальнай кампазітарскай школы, а таксама выхаванне плеяды высокадаравітых кампазітараў і музыказнаўцаў, сярод якіх У. Алоўнікаў, А. Багатыроў, Л. Абеліёвіч, Д. Лукас і інш.
Творчая спадчына кампазітара надзвычай багатая: ён напісаў оперы, балет, сімфоніі, кантаты, рамансы і іншыя творы. Балет “Князь-возера” (паст. 1949) доўгі час ішоў у Беларускім тэатры оперы і балета. За гэты твор В.А. Залатароў быў удастоены Дзяржаўнай прэміі СССР.
Сачыненні В.А. Залатарова вылучаюцца яснай, скончанай фактурай, майстарскім развіццём музычнай думкі, што сведчыць пра шматграннасць творчага ўяўлення і выдатны густ кампазітара.
На выстаўцы прадстаўлены нотныя зборнікі твораў В.А. Залатарова, беларускія народныя песні ў яго апрацоўцы – “Ах, ты сад, ты мой сад…”, “Ох, і сеяла Улляначка лянок” і інш. Сярод экспанатаў – манаграфія аўтара “Фуга” (1932), якая стала першай рускай навуковай работай, прысвечанай гэтай музычнай форме. Наведвальнікі выстаўкі могуць таксама пазнаёміцца з кнігай В.А. Залатарова “Воспоминания о моих великих учителях, друзьях и товарищах” (1957). Працягваюць экспазіцыю кнігі і публікацыі пра кампазітара і яго творчасць.
Кантактны тэлефон: 293-27-52.