Сёння тысячы аматараў кнігі правялі вечар у бібліятэцы, зараджаючыся ведамі, добрым настроем і новымі культурнымі ўражаннямі. Штогадовая акцыя ў падтрымку чытання “Бібліяноч” адбылася!
Бібліяноч ператварыла чытальныя залы бібліятэкі ў тэматычныя пляцоўкі, дзе кожны жадаючы змог знайсці для сябе нешта займальнае.
Аматарам актыўных забаў прыйшліся даспадобы актыўныя квесты па пошуку таямнічых скарбаў “Унутры ромбакубаактаэдра”, гістарычнае падарожжа ў “Сярэбраны век” ад Questoria, майстар-класы па індыйскім і сучасных бальных танцах, “настолкі” HobbyGame.
Пляцоўка “Верны крок” сабрала тых, хто не баіцца кінуць выклік не толькі сабе, але і ўсім вакол. Шахматна-шашачныя турніры і майстар-класы па гульні ў японскія шахматы “сёгі” і кітайскія “сянцы” ад Рэспубліканскага цэнтра алімпійскай падрыхтоўкі па шахматах і шашках забяспечылі напружаную атмасферу спаборніцтва.
Цікава і весела праляцеў час на музычных пляцоўках. Фолк-гурт Guda з удзелам капэлы традыцыйнай музыкі “Анягож” правялі этна-вечарыну. Госці Бібліяночы развучвалі танцы і знаёміліся з традыцыямі. “Музычны салон XIX стагоддзя” сабраў удзельнікаў мерапрыемства на канцэрт-лекцыю класічнай музыкі. А выступленне хору кітайскіх студэнтаў БДПУ LoveMusicTeam і канцэртная праграма ансамбля салістаў Te Deum уразілі майстэрствам выканання і прыгожымі галасамі. Меламаны дакладна не засталіся абыякавымі!
Непадробнае захапленне і сапраўдныя жывыя эмоцыі ў юных удзельнікаў Бібліяночы выклікалі пастаноўкі тэатра лялек “Васілёк”, тэатра мюзікла Metropolis, тэатра “Скамарохі”, выступленні АРТ-тэатра Vershina, цыркавой студыі Fantasy, пазнавальная IT-праграма ад вучэбнага цэнтра “Айціландыя”, а таксама майстар-класы і аквагрым.
Былі і тыя, хто прыйшоў у пятнічны вечар, каб набыць новыя веды. Для аматараў вучыцца праграма прапаноўвала майстар-класы па дэкаратыўна-прыкладным мастацтве, лекцыі адваката, астрапсіхолага, астролага, нутрыцыёлага, імідж-стыліста, сустрэчу з пісьменніцай Ірынай Карнавухавай. А літаратурны клуб “Тры кубкі тэксту” здзіўляў гасцей “тэкстапіццём”.
Бонусныя пляцоўкі, нягледзячы на “фішкавы” ўваход, карысталіся поспехам. Аўтарская экскурсія калекцыянера Віктара Суворава сабрала знаўцаў далікатнай прыгажосці фарфору на выставачным праекце “Фарфоравае асарці”, а аглядная пляцоўка дазволіла самым актыўным наведвальнікам убачыць вячэрні Мінск з вышыні птушынага палёту.
Дзякуй усім, хто ствараў гэты вечар: арганізатарам, удзельнікам, гасцям! Спадзяёмся, у наступным годзе да ўсіх нас прыйдзе чарговая цудоўная “Бібліяноч”. Да новых сустрэч!
Шчыра дзякуем нашым партнёрам за дапамогу ў арганізацыі цудоўнага вечара: