8 чэрвеня ў бібліятэцы адбылася прэзентацыя кнігі К. Цыбульскага “Я застаюся тут”. Выданне ўбачыла свет у 2021 годзе у выдавецтве “Беларусь” пры падтрымцы Міністэрства інфармацыі Рэспублікі Беларусь.
Канстанцін Цыбульскі – вядомы паэт-песеннік, аўтар шматлікіх зборнікаў паэзіі і песень: “Ноч маладзіка” (1994), “Вецер эпохі” (1995), “Малітва і песня” (2006), “Силуэт в окне” (2006), “Мгновение над бездной” (2008), калектыўных зборнікаў: “Вёсны” (1977), “Поиск” (1995), “Я тут бачу свой край” (2005), “Песню бярыце з сабою” (2005).
Яго творы пакладзены на музыку кампазітарамі В. Івановым, Э. Зарыцкім, Л. Захлеўным, іх выконваюць і ўключаюць у свой рэпертуар вядомыя беларускія артысты В. Дайнека, М. Скорыкаў, Я. Навуменка, А. Ярмоленка, ансамблі “Сябры”, “Явар” і іншыя.
Правядзенне прэзентацый кніг сумесна з выдавецтвам “Беларусь” стала добрай традыцыяй. Адкрыла мерапрыемства прывітальным словам генеральны дырэктар Нацыянальнай бібліятэкі Беларусі Аксана Кніжнікава. Пра работу над выданнем распавяла вядучы спецыяліст выдавецтва “Беларусь” Анжэла Садоўская. Знаёмячы з кнігай, Канстанцін Цыбульскі расказаў аб працы над выдавецкім праектам і перадаў экзэмпляр зборніка “Я застаюся тут” у фонд бібліятэкі.
У мерапрыемстве прыняла ўдзел першы намеснік старшыні Саюза пісьменнікаў Беларусі Алена Стэльмах, якая ўручыла паэту грамату за значны творчы ўклад у беларускую літаратуру, актыўны ўдзел у грамадска-культурным жыцці краіны і ў сувязі з яго 65-годдзем.
Цёплую атмасферу вечара стварыў канцэрт, дзе творчыя нумары прадставілі народны артыст Беларусі У. Яцкевіч, артыст Белдзяржфілармоніі А. Балотнік, салісты беларускай эстрады А. Саванец, Д. Хмяльніцкая, В. Альшанская, артыст В. Каняхін, народны ансамбль “Пліса” і арт-група “Золотая мельница”.
Матэрыял пададзены аддзелам сувязей з грамадскасцю.
