22–23 лістапада на базе Магілёўскай абласной бібліятэкі імя У.І. Леніна прайшоў семінар “Сучасны стан і вектары развіцця бібліятэк Рэспублікі Беларусь” з удзелам прадстаўнікоў Міністэрства культуры, кіраўніцтва Нацыянальнай бібліятэкі, дырэктараў бібліятэк Магілёўскай вобласці.
Арганізатарамі мерапрыемства выступілі Міністэрства культуры Рэспублікі Беларусь, Нацыянальная бібліятэка Беларусі і Магілёўская абласная бібліятэка імя У.І. Леніна.
22 лістапада ўдзельнікі семінара абмеркавалі пытанні дзяржаўнага рэгулявання бібліятэчнай галіны рэспублікі і перспектывы далейшага развіцця бібліятэк краіны. Асаблівая ўвага была нададзена праблемам інфарматызацыі і развіцця абслугоўвання ў віртуальным асяроддзі, стварэнню карпаратыўных рэсурсаў і іх рацыянальнаму выкарыстанню для забеспячэння роўнага доступу да інфармацыі жыхароў усіх рэгіёнаў Магілёўскай вобласці.
23 лістапада прадстаўнікі Міністэрства культуры, Нацыянальнай бібліятэкі і Магілёўскай абласной бібліятэкі наведалі аддзяленне кругласутачнага знаходжання для грамадзян пажылога ўзросту і інвалідаў Дрыбінскага раённага цэнтра сацыяльнага абслугоўвання насельніцтва, дзе ў рамках рэспубліканскай акцыі “Кніга – крыніца мудрасці, ведаў і навукі...” перадалі ў дар гэтай установе больш за 170 экз. розных выданняў.
Наступным пунктам маршруту выязнога семінара стала бібліятэка-філіял Дрыбінскай бібліятэчнай сеткі ў аграгарадку Чэрнеўка, дзе размясціўся этнаграфічны куток “Ад родных вытокаў...”, створаны сіламі бібліятэкара Галіны Мікалаеўны Гурскай пры непасрэдным удзеле жыхароў аграгарадка і яго наваколля. На сённяшні дзень у этнаграфічным кутку змяшчаецца больш за 60 экспанатаў. Ён заўсёды поўны наведвальнікаў: праходзяць экскурсіі для беларускіх і замежных турыстаў, віктарыны, турніры і іншыя адукацыйныя мерапрыемствы для дзяцей і дарослых. Актыўная праца бібліятэкі з падрастаючым пакаленнем была адзначана ў 2017 годзе дыпломам першай ступені XXV Рэспубліканскага конкурсу “Бібліятэка – асяродак нацыянальнай культуры”.
У другі дзень удзельнікі семінара наведалі аграгарадок Цёмны Лес, дзе пазнаёміліся з работай аб’яднанай бібліятэкі. Бібліятэкар Алена Міхайлаўна Шавардава падзялілася вопытам сваёй работы, пазнаёміла з экспазіцыяй літаратурна-краязнаўчага музейнага пакоя “Паэтычная зорка маленькай радзімы”, створанага ёю разам з членамі краязнаўчага клуба “Спадчына”. Экспазіцыя ў ім прысвечана жыццю і творчасці вядомай беларускай паэтэсы Ніны Дзмітрыеўны Кавалёвай – ураджэнкі в. Еськаўка Дрыбінскага раёна.
Наступным пунктам маршруту выязнога семінара была вёска Пакуцце Дрыбінскага раёна, дзе ўдзельнікі пазнаёміліся з работай мабільнай бібліятэкі.
Кульмінацыяй мерапрыемства стала наведванне цэнтральнай раённай бібліятэкі і дзіцячай бібліятэкі-філіяла Дрыбінскай бібліятэчнай сеткі. Усе ўдзельнікі семінара адзначылі высокі ўзровень матэрыяльна-тэхнічнай базы, зацікаўленае і адказнае стаўленне супрацоўнікаў і, як следства, – велізарную запатрабаванасць бібліятэк у мясцовых жыхароў.