21 лістапада навуковы супрацоўнік цэнтра даследаванняў беларускай культуры, мовы і літаратуры Нацыянальнай акадэміі навук Беларусі, этнамузыкалогіі Таццяна Леанідаўна Канстанцінава ў рамках “Гадзіны музыкі” выступіла з прэзентацыяй на тэму “Каляндарныя абрады і песні беларусаў у восеньскi перыяд”.
Музыказнаўца распавяла пра асаблівасці правядзення восеньскіх абрадаў у розных кутках Беларусі, на прыкладзе архіўных і экспедыцыйных аўдыязапісаў раскрыла стылявыя, сюжэтна-тэматычныя і рэгіянальныя асаблівасці беларускіх песень названага перыяду. Асобныя ўзоры аўтэнтычнага выканання зрабілі на слухачоў асабліва моцнае ўражанне. Аўдыторыя адзначыла самабытнасць іх напеваў і своеасаблівасць жанравага зместу.
Напрыканцы лекцыі быў паказаны відэафільм “Свята піва”, у якім аўтэнтычна-фальклорны гурт вёскі Асавец Бялыніцкага раёна Магілёўскай вобласці выконвае беларускія песні, дэманструе элементы народных танцаў і дзеліцца з гледачамі сакрэтамі прыгатавання хмельнага напою.
Варта сказаць, што мерапрыемства пакінула масу станоўчых эмоцый і яшчэ раз пераканала ў важнасці даследавання нацыянальнай культуры.
Наступная лекцыя адбудзецца 28 лістапада ў 15:00.
Чакаем вас!
Уваход вольны (пры наяўнасці чытацкага білета або пропуску сацыякультурнага цэнтра).
Тэлефон для даведак: (8 017) 293 27 52.
Матэрыял прадастаўлены аддзелам абслугоўвання спецыялізаванымі фондамі.
