24 чэрвеня ў бібліятэцы адбыўся вэб-семінар па пытанні стварэння Дзяржаўнага рэестра кніжных помнікаў Рэспублікі Беларусь.
Арганізатарам мерапрыемства выступіла Нацыянальная бібліятэка Беларусі, на якую ўскладзена функцыя фарміравання і вядзення Дзяржаўнага рэестра кніжных помнікаў Рэспублікі Беларусь (далей – Рэестр).
У мерапрыемстве прынялі ўдзел прадстаўнікі бібліятэк, музеяў і архіваў Беларусі. З прапановамі і пытаннямі ў анлайн-рэжыме выступілі прадстаўнікі абласных бібліятэк краіны (Брэсцкай абласной бібліятэкі імя М.Горкага, Віцебскай абласной бібліятэкі імя У.І. Леніна, Гомельскай абласной універсальнай бібліятэкі імя У.І. Леніна, Гродзенскай абласной навуковай бібліятэкі імя Я.Ф.Карскага, Магілёўскай абласной бібліятэкі імя У.І.Леніна), а таксама Нацыянальнага полацкага гісторыка-культурнага музея-запаведніка.
З паведамленнямі выступілі намеснік дырэктара па навуковай і выдавецкай дзейнасці Нацыянальнай бібліятэкі Беларусі Аляксандр Суша, загадчык навукова-даследчага аддзела кнігазнаўства Нацыянальнай бібліятэкі Беларусі Галіна Кірэева, загадчык аддзела рэдкіх кніг і рукапісаў Цэнтральнай навуковай бібліятэкі імя Я.Коласа Нацыянальнай акадэміі навук Беларусі Аляксандр Сцефановіч, загадчык аддзела старадрукаў і рэдкіх выданняў Прэзідэнцкай бібліятэкі Рэспублікі Беларусь Валерый Герасімаў, вядучы бібліёграф залы рэдкіх кніг і дакументаў аддзела абслугоўвання Беларускага дзяржаўнага ўніверсітэта культуры і мастацтваў Тамара Самайлюк, дырэктар Беларускага дзяржаўнага архіва-музея літаратуры і мастацтва Ганна Запартыка.
Удзельнікі семінара падкрэслілі, што для якаснага вядзення Рэестра неабходна: правесці аналіз сучаснага стану работы з кніжнымі помнікамі ўстаноў-фондатрымальніц, распрацаваць навуковае і метадычнае забеспячэнне працы, стварыць уніфікаванае праграмнае забеспячэнне, хадайнічаць аб стварэнні міжведамаснага савета і арганізаваць рэгіянальныя цэнтры па вядзенні Рэестра, уключыць у сістэму прафесійнай бібліятэчнай адукацыі падрыхтоўку кадраў і рэгулярнае павышэнне кваліфікацыі спецыялістаў, арыентаваных на працу з кніжнымі помнікамі.
Нацыянальная бібліятэка рэкамендавала ў якасці метадычнай асновы для працы з кніжнымі помнікамі электроннае выданне “Кніжныя помнікі: выяўленне, апісанне, захоўванне, выкарыстанне: метадычныя матэрыялы” (Мінск: Нацыянальная бібліятэка Беларусі, 2012).
 |
 |
 |
 |
 |
 |
