12 снежня ў бібліятэцы адбыўся кінапаказ фільма “Першы настаўнік”, а таксама адкрыліся фотавыстава і кніжная выстава-прагляд, прысвечаныя 95-годдзю з дня нараджэння Чынгіза Айтматава, вядомага і ўшанаванага ва ўсім свеце пісьменніка.
Чынгіз Айтматаў увайшоў у гісторыю як вялікі пісьменнік і філосаф сучаснасці, які ўнёс вялікі ўклад у развіццё сусветнай, савецкай і нацыянальнай кыргызскай культуры, літаратуры і мастацтва. Яго творы перакладзены больш чым на 170 моў свету і выдадзены ў 128 краінах агульным тыражом больш за 100 млн экзэмпляраў. Чынгіз Тарэкулавіч неаднаразова намінаваўся на Нобелеўскую прэмію. У ЮНЕСКА яго кнігі лічацца самымі чытэльнымі ў свеце пасля кніг Уільяма Шэкспіра і Льва Талстога.
Нацыянальная бібліятэка Беларусі падрыхтавала кніжную выставу-прагляд пра жыццёвы і творчы шлях майстра слова. У яе фондах – больш за 140 кніг Чынгіза Айтматава, выдадзеных з 1958 года да сучаснасці. У экспазіцыі прадстаўлены раманы, аповесці і апавяданні, п’есы, публіцыстыка, крытычныя матэрыялы, напісаныя Айтматавым. У ліку найбольш значных выданняў – Поўны збор твораў пісьменніка ў 10-ці тамах, які ўбачыў свет у 2018 годзе. Таксама прадстаўлены выданні яго твораў на кыргызскай, англійскай і нямецкай мовах.
У фондах бібліятэкі захоўваецца больш за 250 выданняў крытычнай літаратуры пра Чынгіза Айтматава. У ліку прадстаўленых на выставе матэрыялаў – навуковыя, навукова-папулярныя, метадычныя выданні, у якіх даследуюцца розныя грані творчасці пісьменніка.
У мерапрыемстве ўзялі ўдзел Надзвычайны і Паўнамоцны Пасол Кыргызскай Рэспублікі ў Рэспубліцы Беларусь Эрбол Султанбаеў, намеснік генеральнага дырэктара Нацыянальнай бібліятэкі Беларусі Віктар Пшыбытка, старшыня Саюза пісьменнікаў Беларусі Аляксандр Карлюкевіч.
Матэрыял пададзены аддзелам сувязей з грамадскасцю.