Нацыянальная бібліятэка Беларусі ўзяла актыўны ўдзел у святочных мерапрыемствах, прысвечаных Дню беларускага пісьменства, якія ладзіліся 3–4 верасня ў г. Ганцавічы.
З нагоды свята Нацыянальная бібліятэка выступіла як вядучая ўстанова ў галіне бібліятэка- і кнігазнаўства, збіральніца і захавальніца гісторыка-культурных каштоўнасцей і духоўнай спадчыны нашага народа, сацыякультурны, а таксама метадычны і каардынацыйны цэнтр, папулярызатар беларускай культуры і літаратуры. Супрацоўнікі бібліятэкі арганізавалі і правялі шэраг мерапрыемстваў.
Да навукова-практычнай канферэнцыі “Ганцавіцкія чытанні – 2011” (3 верасня 2011 г.) М.Г. Пшыбытка, загадчыца навукова-даследчага аддзела бібліятэказнаўства Нацыянальнай бібліятэкі Беларусі, падрыхтавала даклад “Дзіцячае чытанне: сучасны стан і тэндэнцыі развіцця”, ў якім зрабіла аналіз сучаснага стану чытання дзяцей і падлеткаў, а таксама прапанавала шляхі яго падтрымкі і развіцця, у тым ліку праз распрацоўку дзяржаўнай праграмы.
Мясцовыя жыхары і госці г. Ганцавічы мелі ўнікальную магчымасць ўбачыць беларускія старадрукі XVIІ–XVIII стст. з фондаў Нацыянальнай бібліятэкі Беларусі на выстаўцы “Кніга Беларусі: повязь часоў”.
Сімвалам беларускага друку і гісторыі беларускай кнігі стала кніга першадрукара Францыска Скарыны (на выстаўцы дэманстраваўся муляж “Кнігі Быцця” (Прага, 1518) з фондаў Нацыянальнага гістарычнага музея Рэспублікі Беларусь). Творчасць Францыска Скарыны, славутага дзеяча беларускай, славянскай і сусветнай культуры, аказала вялікае ўздзеянне на развіццё беларускай мовы, літаратуры і кнігадрукавання. Нацыянальная бібліятэка Беларусі з’яўляецца адзінай у краіне захавальніцай найкаштоўнейшага скарбу беларускай культуры – выданняў Францыска Скарыны: 10 выпускаў Бібліі (у шасці аправах), выдадзеных у Празе ў 1517–1519 гг.
На выстаўцы былі прадстаўлены дзесяць старадрукаў беларускіх друкарняў XVIІ–XVIII стст. Найбольш старажытны – кніга XVIІ ст. “Новый Завет” (1652), выдадзеная ў Куцеінскай друкарні, якая з’яўлялася на той час цэнтрам беларускага кірылічнага кнігадрукавання. З кірылічных старадрукаў дэманстраваліся таксама кнігі, выдадзеныя ў Вільні, Гродна, Магілёве і Супраслі. На польскай і лацінскай мовах былі прадстаўлены старадрукі Нясвіжскай і Полацкай друкарняў.
Кніжная выстаўка “Народны настаўнік” была прысвечана творчасці класіка беларускай літаратуры Якуба Коласа, творы якога вучаць жыць, працаваць, любіць чалавека і Радзіму. Якуб Колас пакінуў вялікую літаратурную спадчыну. Ён быў выдатным майстрам ва ўсёй сваёй шматграннай творчасці: найталенавіцейшым паэтам, празаікам, драматургам, клапатлівым настаўнікам па прафесіі і адукацыі, мастаком-выхавальнікам па характары свайго даравання.
Экспазіцыя налічвала каля 50 выданняў найбольш значных твораў класіка, якія друкаваліся з 1910 па 2011 г. і закранулі амаль усе гістарычна-адметныя перыяды гэтага стагоддзя. Асаблівую ўвагу арганізатары дадзенай выстаўкі засяродзілі менавіта на дарэвалюцыйным часе, калі выпускнік Нясвіжскай настаўніцкай семінарыі К.М. Міцкевіч пачаў працаваць настаўнікам у вёсцы Люсіна (цяпер Ганцавіцкі раён), і даваенным перыядзе творчасці пісьменніка, калі былі задуманы, створаны і ўпершыню пабачылі свет яго самыя вядомыя творы.
Адбылася прэзентацыя мультымедыйнага выдання Нацыянальнай бібліятэкі Беларусі “Паэт красы і гармоніі”, прысвечанага 120-годдзю з дня нараджэння Максіма Багдановіча – класіка беларускай літаратуры, выдатнага паэта, перакладчыка і публіцыста.
Электроннае выданне ўключае вялікі аб’ём бібліяграфічнай, паўнатэкставай, фактаграфічнай, графічнай і гукавой інфармацыі, звязанай з імем і творчасцю М. Багдановіча.
Інфармацыя сістэматызавана і прадстаўлена ў 4-х раздзелах:
- Творчая спадчына М. Багдановіча.
- Літаратура пра жыццё і творчасць.
- М. Багдановіч у мастацтве і мастацкай літаратуры.
- Ушанаванне памяці М. Багдановіча.
Ганцавіцкай раённай цэнтралізаванай бібліятэчнай сістэме Брэсцкай вобласці Нацыянальная бібліятэка Беларусі перадала ў дар 70 экзэмпляраў друкаваных дакументаў, сярод якіх маляўнічыя альбомы і цікавыя кнігі па гісторыі і сучасным стане Рэспублікі Беларусь, беларускай культуры і літаратуры, творы беларускіх і замежных пісьменнікаў, падручнікі і вучэбныя дапаможнікі па эканоміцы, юрыспрудэнцыі, мовазнаўстве, псіхалогіі, міжнародных адносінах і інш.
Чытайце таксама:
Новае выданне Нацыянальнай бібліятэкі Беларусі прысвечана М. Багдановічу
 |
 |
 |
 |
 |
 |
 |
 |
 |
 |
 |
 |
